Marhamatlik tadbirkor o‘zi ta'lim olgan maktabga kitoblar va kompyuter jamlanmalari sovg‘a qildi

Ommaviy axborot vositalarida o‘zi ta'lim olgan maktabiga kitoblar sovg‘a qilayotgan amaldorlar, turli kishilar haqida ko‘plab xabarlar berilyapti. Ularning mazkur ishlari keng ommaga ibrat sifatida yoritib borilmoqda.

O‘tgan yilning dekabr oyida Andijon viloyati, Marhamat tumanida tadbirkorning o‘z mablag‘iga qurilgan bog‘chani hamqishloqlariga sovg‘a qilgani haqida xabar berilgandi.

Kuni kecha tadbirkor Qobiljon Obidov o‘zi ta'lim olgan 24-umumiy o‘rta ta'lim maktabiga 100 dona kitob, kompyuter jamlanmalari hamda 10 ming dona elektron shakldagi kitoblar sovg‘a qildi.

Tashkil qilingan mo‘'jaz tadbirda tuman mutasaddilari va homiy tadbirkor o‘quvchilarga inson kamolotida kitobning o‘rni haqida gapirib o‘tdilar.

Qobiljon Obidov o‘tgan oyda poytaxtdagi Muqimiy teatriga ham kitoblar taqdim etib, kutubxona tashkil qilgan edi.  

Elmurod Ermatov, Andijon