Mirziyoyev O‘zbekistonning Yevroosiyo iqtisodiy ittifoqiga qo‘shilish foyda-zararlarini qiyosladi

O‘zbekiston jahon bozorida o‘z o‘rniga ega bo‘lishi uchun raqobatbardosh bo‘lishi kerak. Buning uchun sifatli, zamon talabiga munosib mahsulotlarni ishlab chiqarish lozim. Ammo eng katta muammo, Prezident Mirziyoyevga ko‘ra, ishlab chiqilgan mahsulotlarning bozorini topishdir. U, Senatning 20-majlisida senatorlarga murojaat qilar ekan, ayni masalalar, Yevroosiyo iqtisodiy hamjamiyatiga a'zo bo‘lish va bo‘lmaslik ortidan kelib chiqadigan foyda-zararlar xususida ham fikr bildirdi, deb xabar qilmoqda Kun.uz muxbiri.

«Sifatli, jahon bozoriga mos, eksportbop mahsulot ishlab chiqarish bir muammo bo‘lsa, uning bozorini topish 10 muammo. Rossiya va YevrAzeS (Yevroosiyo iqtisodiy ittifoqi) istaymizmi-yo‘qmi, asosiy hamkorlarimizdir. 70 foiz oldi-sotdimiz shular bilan bog‘liq. 

Mana yaqinda YevrAzeS mahsulotlarini bir xil markirovka (tamg‘alash) qilishga o‘tadi. Biz mahsulotlarimizni ushbu ittifoq hududidan o‘tkazayotganimizda alohida ko‘zga tashlanib qoladi va munosabat ham shunga yarasha bo‘ladi. Bundan kim zarar ko‘radi? 

Ammo, bu tashkilotga a'zo bo‘lsak, chegaralarni ochishga to‘g‘ri keladi va mahalliy ishlab chiqaruvchilar ittifoq talabiga moslashguncha, chegaralarni ochganimiz tufayli kasodga uchraydi. Har tomonini o‘ylab, manfaatlarimizga mos jihatini tanlashimiz kerak», - dedi davlat rahbari. 

Yevroosiyo iqtisodiy ittifoqi (YeOII) mintaqaviy iqtisodiy integratsiya xalqaro tashkiloti bo‘lib, bugungi kunda ushbu tashkilotga Armaniston, Belorussiya, Qozog‘iston, Qirg‘iziston va Rossiya a'zodir. Moldova kuzatuvchi davlat hisoblansa, Vetnam, Eron, Xitoy, Kuba bilan erkin savdo hududi to‘g‘risidagi kelishuvlar imzolangan. 

Ayni vaqtda Misr, Tayland, Mo‘g‘iliston, Serbiya, Hindiston va Singapur bilan tashkilot va ushbu mamlakatlar o‘rtasida erkin savdo hududini tashkil etishga doir muzokaralar olib borilmoqda. 10 mamlakat, jumladan, Vengriya, Koreya respublikasi, Indoneziya va Yaponiya kabi mamlakatlar ushbu ittifoq bilan hamkorlik masalalariga qiziqish bildirmoqda. 

Umuman olganda, dunyoning 50ga yaqin mamlakati YeOII bilan hamkorlik qilish istagini bildirgan.