01:26 / 23.07.2019
11390
ОАВ Британиянинг Форс кўрфазига атом сув ости кемаси юбориш режасидан хабар топди
Фото: AP

Британия ҳукумати Эрон томонидан Ҳурмуз бўғозида Британияга қарашли Stena Impero танкери ушланганидан кейин Форс кўрфазига атом сув ости кемаси юборишни режалаштирмоқда. Шунингдек, у ерга денгиз пиёда қўшинлари отрядларини ташлаш ҳам муҳокама қилинмоқда.   

The Sun британ нашрининг манбаларга таяниб ёзишича, қанотли ва кемаларга қарши ракеталарни таший оладиган сув ости кемаси “танкерларни кузатиб бориш учун маълумотлар тўплаш” билан шуғулланади.

Қўшинлар эса кемаларда жойлаштирилиши ёки кемаларни қўриқлаб бориш учун қўлланиши мумкин.

Лондонда таъкидланишича, Теҳрон билан можарони авж олдириш исталмаяпти, бироқ уни босиб туриш ва қўрқитиш учун чоралар қабул қилинмоқчи.

Танкер 19 июлда Ислом инқилоби соқчилари корпуси ҳарбийлари томонидан ушланган. Унинг бортида 23 киши бўлган. Теҳронда таъкидланишича, танкер экипажи аъзолари соғ-саломат. 

Top