Axborot va ommaviy kommunikatsiyalar agentligida O‘zbekiston Respublikasi Maktabgacha ta'lim vazirligi mutasaddilari va vazir Agrippina Shin ishtirokida jurnalistlar bilan ochiq muloqot bo‘lib o‘tdi.
Kun.uz muxbiri vazirga “onalik ta'tili 2 yil davom etadi, ammo bolani maktabgacha ta'limga jalb qilish 3 yoshdan boshlanadi. O‘rtada bir yil onalar uchun noqulay payt, shunga qanday izoh berasiz?” deya savol berganida, vazir:
- Bu masala ko‘pchilikni qiziqtiradi, o‘zimga ham bu savolni ko‘p berishadi. Onalarni to‘g‘ri tushunaman, lekin bir narsani anglab yetishimiz kerak – bola aynan 3 yoshdan boshlab ta'limga moslashadi va 7 yoshigacha asosiy axborotlarni qabul qilib oladi. Yana bir jihati, o‘zi shundoq ham bolalarni qamrab olishimiz 40 foiz atrofida, qabul yoshini 2 yoshga tushirsak, bu ko‘rsatkich yanada tushadi. Lekin bu 2 yoshdagi bolalar umuman qabul qilinmaydi, degani emas. Davlat-xususiy sherikchilik tizimida, xususiy bog‘chalarda 2 yoshdan olishga ruxsat berilgan. Bundan tashqari, onalar bola 2 yoshigacha haq to‘lanuvchi ta'tilda bo‘lsalar ham, bola 3 yoshigacha ish o‘rinlarini saqlab qoladilar. Eng muhimi, qamrab olish imkoniyatlarimiz kengayishi bilan biz bu masalani qayta ko‘rib chiqamiz, - deya javob berdi.
