Vazir bog‘cha mudiralarini sertifikat asosida ishga olish haqidagi savolga javob berdi

Yaqinda Qashqadaryodagi bog‘chalardan birida mudira tayinlanishi janjalga sabab bo‘ldi. Bu lavozimga tayinlanishdagi korrupsiya va inson omilini kamaytirish uchun maktab direktorlaridan talab qilinayotgan sertifikat tizimini bog‘chalarga ham joriy etish mumkinmi? Vazir Agrippina Shin shu savolga javoban tegishli magistratura yo‘nalishi ochilganini aytdi, lekin sertifikat haqida gapirmadi.

{Yii::t(}

O'tkazib yuborish 6s

Shu yildan boshlab, maktab direktori lavozimiga tayinlanish uchun nomzodlar maxsus kursda o‘qigan va imtihondan o‘tib, menejyerlik sertifikatini olgan bo‘lishi shart degan talab o‘rnatildi. Kun.uz muxbiri yaqinda Qashqadaryoning Mirishkor tumanida bog‘cha mudirasini tayinlash jarayoni janjalga aylanib ketganidan kelib chiqib, bunday sertifikatni bog‘chalarga ham tatbiq qilish zarurati haqida maktabgacha ta’lim vaziri Agrippina Shinning fikri bilan qiziqdi.

Vazir savolga javoban kadrlarni bog‘cha mudirligiga o‘qitish yo‘lga qo‘yilayotganini aytdi, lekin sertifikat masalasini tilga olmadi.

“Bilasiz, qonunchilikka ko‘ra, bizda bog‘chalar maktabgacha ta’lim muassasasi emas, balki qonunan biror mablag‘dan foyda olish huquqiga ega maktabgacha ta’lim tashkilotlari hisoblanadi. Shundan kelib chiqsak, tashkilot direktorlari birinchi navbatda menejyer, boshqaruvchi bo‘la olishi kerak. Afsuski, bizda boshqaruvchilarni tayyorlashmaydi.

Birinchi marotaba boshqaruvchilarni tayyorlash maqsadida Lomonosov nomidagi Moskva davlat universitetida [Toshkentdagi filiali nazarda tutilmoqda – tahr.] 2023 yil uchun magistratura ochdik. Aynan mana shu loyihadan olingan tajriba asosida keyinchalik o‘zimizning milliy OTMlar ham kadr tayyorlashni boshlaydi. Bizga boshqaruvchilar kerak. Maktabgacha ta’lim tizimidagi metodikalar bilan esa maktabgacha ta’lim ma’lumotiga ega metodistlar shug‘ullanadi”, – dedi u.

Shuningdek, Agrippina Shin anjumanda jurnalistlar tomonidan berilgan savollar ko‘rib chiqilishini ma’lum qildi. Ammo aynan sertifikatlar orqali bog‘cha direktorlarini tayinlash masalasi ochiqligicha qoldi.

#bog‘cha #Agrippina Shin