Hongkong aeroportidagi namoyishchilar turistlardan uzr so‘rashdi

Hongkong xalqaro aeroportining kutish zalidagi namoyishchilar seshanba kungi voqealar uchun turistlardan uzr so‘rashdi.

Hongkong xalqaro aeroporti chorshanba kuni ikki kun davomida uchish-kutish zalida namoyishchilar uyushtirgan tartibsizliklardan so‘ng o‘z ishini asta tiklay boshladi. Aeroport ma'muriyati yuzlab reyslarni bekor qilishga majbur bo‘ldi. Seshanba kuni politsiya va namoyishchilar o‘rtasida to‘qnashuvlar yuz berdi.

Hozirda kutish zalida bir necha o‘n nafar namoyishchilar qolgan. Ular uzr so‘ralgan yozuvlar bitilgan plakatlarni qo‘yib olishgan.

"Aziz turistlar! Biz kecha yuz bergan voqeadan afsusdamiz. Biz tushkunlikda edik va unchalik to‘g‘ri bo‘lmagan qarorlarni qabul qildik. Uzrimizni qabul qiling", - deb yozilgan plakatlarda.

Hongkong xalqaro aeroporti dunyodagi eng gavjum xalqaro transport xablaridan hisoblanadi. Bu yerda kuniga 800ga yaqin reysga xizmat ko‘rsatiladi, shu bois uning ishidagi uzilishlar o‘n minglab turistlarga ta'sir qildi.