Amerikaning Purdue Pharma farmatsevtika kompaniyasi va uning egalari – multimilliarder Saklerlar oilasi kompaniya ishlab chiqaradigan "OksiKontin" (OxyContin) preparati bilan bog‘liq da'volar bo‘yicha suddan tashqari kelishuvga erishishga qaror qildi. The Guardian gazetasining xabar qilishicha, gap AQShdagi ikki mingdan ortiq fuqaroning 10-12 mlrd dollar miqdoridagi da'vosi haqida bormoqda.
Purdue Pharma AQShni qamrab olgan oipoid inqirozi bilan bog‘liq mojaro markazida qoldi. Kompaniyani ushbu inqirozda ayblashmoqda: keyingi 20 yil ichida opioidlardan 400 mingdan ortiq amerikalik halok bo‘lgan. Preparatlarni suiiste'mol qilishdan har kuni 130 kishi o‘ladi.
Farmatsevtika kompaniyalarini tarkibida opioid bo‘lgan preparatlarning nojo‘ya ta'sirlarini shifokorlardan yashirishda yoki bunga ko‘z yumishga undashda ayblashmoqda. Lobbistlar shifokorlarni ana shunday dorilarni ko‘proq yozib berishga ko‘ndirishmoqda, bemorlar esa bu dorilarga "o‘tirib" qolishmoqda.
OAVning yozishicha, Saklerlar oilasi Purdue Pharma kompaniyasini boshqarishdan voz kechadi va o‘z yonlaridan 3 mlrd dollar to‘laydi. Kompaniya boshqaruv shakli ham o‘zgaradi hamda daromadlar da'vo summalarini to‘lashga sarflanadi.
Avvalroq Johnson&Johnson kompaniyasi opioid inqirozida ayblanib, 572 mln dollar jarima to‘lashga hukm qilingandi.
