Yaponiya KXDR uch oy ichida to‘qqiz marta yangi raketalar sinovini o‘tkazganini bildirdi

Shimoliy Koreya may oyidan buyon to‘qqiz marta uchta modifikatsiyadagi raketani sinovdan o‘tkazdi. Bu haqda Yaponiya mudofaa vaziri Takesi Ivaya ma'lum qildi.

"Maydan buyon Shimoliy Koreya 9 marta raketa uchirdi. 4 va 9 may, 25 iyul va 6 avgust kunlari "Iskander" turidagi raketaga o‘xshash raketalar sinovdan o‘tkazildi. Ular ilgari Shimoliy Koreyada bo‘lgan raketalardan farq qiladi. Shuningdek, 24 avgustda qattiq yonilg‘ida uchadigan raketalar sinovdan o‘tkazildi. Bundan tashqari, 10 va 16 avgustda uchirilgan raketalar Amerikaning ACMS raketalarini yodga soladi", - dedi vazir.

Uning ta'kidlashicha, yakuniy xulosaga kelish uchun qo‘shimcha tahlillar talab qilinadi. Ammo ekspertlar barcha raketalar kichik masofaga mo‘ljallangan yangi turdagi raketalar turiga mansub degan fikrda.