Sanoat elektron portali ishga tushiriladi – Iqtisodiyot va sanoat vazirligi

Bugun, 18 sentabr kuni Iqtisodiyot va sanoat vazirligi binosida Moliya vazirligi, bojxona qo‘mitasi, statistika qo‘mitasi hamda Iqtisodiyot va sanoat vazirligi vakillari bilan anjuman o‘tkazildi. Unda eksportbop, import o‘rnini bosuvchi mahsulotlar ishlab chiqarish, mahalliylashtirish darajasini oshirish, mustahkam sanoat tizimini yaratish va boshqa masalalar ijrosi qanday amalga oshirilishi yuzasidan mulohazalar bildirildi. Iqtisodiyot va sanoat vaziri o‘rinbosari O‘ktamjon Karimov ayni vaqtda ishlab chiqaruvchi va iste'molchi o‘rtasida aloqaning sustligini ta'kidlab o‘tdi va buni hal qilish uchun vazirlik tomonidan qilinadigan harakatlar haqida ma'lumot berdi.

“O‘zbekistonda iste'molchi va ishlab chiqaruvchilar o‘rtasida mustahkam aloqa tizimi yo‘q. Buni o‘zgartirish uchun nima qilmoqchimiz? Yechimini topdik: cooperation.uz sanoat elektron portali ishga tushiriladi. Mamlakatda 610 ta yirik va 64 mingdan ziyod kichik sanoat korxonalari bor. Ular qanday turdagi mahsulot ishlab chiqarishi, eksport, import hajmi – hammasi haqidagi ma'lumotlar portalga joylashtiriladi. Jarayonni 2 bosqichda amalga oshiramiz. Birinchisida davlat ulushi bo‘lgan sanoat korxonalari haqida ma'lumotlar beriladi. Ikkinchi bosqichda esa xususiy korxonalar ham qamrab olinadi. Portalga a'zo bo‘lish bepul va u 24/7 rejimida ishlaydi. Eng katta yutuq ma'lumotlar ochiq taqdim etilishidir. Istagan foydalanuvchi portalga kirib O‘zbekistonga qanday turdagi mahsulot qancha miqdorda import yoki eksport qilinayotgani haqida bilishi mumkin”.