Rossiyaning Barnaulida Boeing-767 keskin qo‘nishni amalga oshirdi, 49 kishi jarohat oldi

Rossiyaning Barnaul shahrida Azur air aviakompaniyasining Vetnamning Kamran shahridan uchib kelgan Boeing-767 samolyoti keskin qo‘nishni amalga oshirdi. Oqibatda 49 kishi jarohat olgan, deb xabar berdi “Interfaks” axborot agentligi.    

Oltoy o‘lkasi transport vazirligi ma'lumotlariga ko‘ra, samolyot bortida 341 kishi, jumladan ekipajning 10 a'zosi bo‘lgan.  

Dastlabki ma'lumotlarga ko‘ra, samolyot shassisining o‘ng tayanchi tutagan. Samolyot sardori uchish-qo‘nish yo‘lagiga tekkach, shassi yonayotgan bo‘lishi mumkinligini xabar qilgan. Shundan keyin dispetcher trevoga e'lon qilgan.

Hech kim og‘ir jarohat olmagan. Yo‘lovchilarni evakuatsiya qilishda 7 ta tez yordam brigadasi ishtirok etgan.

Guvohlarning aytishicha, samolyot yerga tekkach, yana havoga ko‘tarilgan. Bunda uning dvigatellaridan biri yerga tekkan.