Dilshod Axatov O‘zbekistondagi diplomatik missiyasini yakunlayotgan Yangi Zelandiya elchisi bilan uchrashdi

Uchrashuvda siyosiy, savdo-iqtisodiy, investitsiya, turizm, madaniy-gumanitar va boshqa sohalarda O‘zbekiston-Yangi Zelandiya munosabatlarining istiqbollari muhokama qilindi, o‘zaro hamkorlikni sifat jihatdan yuqori darajaga ko‘tarish uchun yangi yo‘nalishlarni birgalikda izlashga ikki tomon ham tayyorligi tasdiqlandi.

Savdo aylanmasi hajmlarini oshirish, qishloq xo‘jaligi, muqobil elektr energetika, turizm, ta'lim, axborot-kommunikatsiya texnologiyalari va ilmiy tadqiqotlar sohalarida qo‘shma investitsiya loyihalarini ro‘yobga chiqarish mexanizmlarining amaliy jihatlari to‘g‘risida fikr almashildi.

Suhbatda xalqaro tashkilot va tuzilmalar, jumladan BMT doirasidagi hamkorlik masalalari ham muhokama qilindi.

O‘zbekistonda diplomatik missiyasini yakunlayotgani munosabati bilan elchiga mamlakatlarimiz o‘rtasidagi hamkorlikni mustahkamlashga qo‘shgan shaxsiy hissasi uchun minnatdorchilik bildirildi.

Ien Aleksandr Hill o‘z navbatida O‘zbekistondagi faoliyati doimiy ravishda qo‘llab-quvatlangani uchun minnatdorchilik izhor etdi.