Toshkentda bedarak yo‘qolgan 11 yoshli qizcha Farg‘onada topildi 

Toshkent shahar ichki ishlar bosh boshqarmasi Toshkentda bedarak yo‘qolgan 11 yoshli qizcha topilganini ma'lum qildi.

Xabarda ta'kidlanishicha, internetda yo‘qolgani haqida xabar tarqalgan Z.T. ismli qizchaning onasi 12 noyabrda soat 18.40da “102” raqamiga murojaat qilib, qizi yo‘qligidan xavotir bildirgan. Qizning ota-onasi bilan suhbatda Olmazor tumani ichki ishlar boshqarmasi xodimlari oilaning barcha yaqinlari va qizning dugonalari hamda sinfdoshlari haqidagi ma'lumotlar va kontaktlarni olishgan. So‘ngra ulardan har biri bilan suhbat vaqtida qizcha Farg‘ona viloyati Qo‘qon shahrida bobo-buvisinikida ekanligi aniqlangan. Ma'lum qilinishicha, qiz u yerga taksida o‘zboshimchalik bilan ketgan.

Ayni vaqtda qizcha Qo‘qondagi qarindoshlarinikida qolmoqda.

Shu munosabat bilan, Toshkent shahar ichki ishlar bosh boshqarmasi fuqarolardan sarosima va ortiqcha shov-shuv ko‘tarmaslik uchun tekshirilmagan axborotni tarqatmaslikni iltimos qilib qoladi.