Qoʻshimcha funksionallar
-
Tungi ko‘rinish
Chilonzor tumanini elektr uzilishlari qamrab oldi
Soat 14:30 holatiga, Chilonzor, Olmazor, Yakkasaroy, Yunusobod, Yashnobod, Mirzo Ulug‘bek, Sergeli va Zangiota tumanlaridagi 8250 ta iste’molchi avariyalar tufayli elektr tarmog‘idan uzilgan. Ayniqsa Chilonzor tumanining ko‘plab mahallalari jazirama issiq sharoitida bir necha soatlab davom etayotgan uzilishlar girdobida qoldi. Respublika bo‘ylab joylarda elektr ta’minotiga 2 soatlik majburiy profilaktik cheklovlar joriy etilgan.
Jazirama issiq sharoitida elektr tarmoqlariga yuklama oshishi ortidan, 17 iyul kuni soat 14:30 holatiga Toshkent shahri va viloyatidagi ayrim elektr uzatish tarmoqlari hamda podstansiyalarda texnik nosozliklar yuzaga kelgan.
Energetika vazirligi xabariga ko‘ra, buning oqibatida Olmazor, Yakkasaroy, Chilonzor, Yunusobod, Yashnobod, Mirzo Ulug‘bek, Sergeli va Zangiota tumanlaridagi 8 250 ta iste’molchi elektr ta’minotidan vaqtincha uzilgan.
Maxsus brigadalar nosozliklarni bartaraf etish ustida ishlayapti. Vazirlik keltirilgan noqulayliklar uchun iste’molchilardan uzr so‘ragan.
Chilonzorda ahvol ayniqsa chatoq
Jamoatchilik faoli Shuhratbek Qurbonov tomonidan yaratilgan Chiroqyoq.uz saytidagi xaritaga qaraganda, uzilishlarning eng katta qismi Chilonzor tumaniga to‘g‘ri keladi.
Chilonzor tumani elektr tarmoqlari korxonasi soat 10:24 da bergan xabarda (mazkur xabar soat 14:33 da ham takroran joylangan) uzilishlarga nomi keltirilmagan podstansiyadagi avariya sabab bo‘lgani aytilgan.
Ushbu tuman ETKning soat 10:32 dagi boshqa bir xabarida esa (mazkur xabar soat 14:18 da qayta joylangan), GES-9 podstansiyasida yuqori yuklama yuzaga kelgani sababli avariyaviy holatlarning oldini olish maqsadida Chilonzor tumanidagi “Umid” taqsimlash punktidan (RP) chiquvchi yuqori kuchlanishli elektr uzatish tarmog‘i o‘chirilgani ma’lum qilingan.
Shu munosabat bilan Chilonzor tumanining 5-, 6-, 7-, 8-kvartallari hamda Bunyodkor, Sharq tongi, Muqimiy, Navbahor va Qatortol ko‘chalarida elektr energiyasi ta’minotida uzilishlar yuzaga kelgan.
Elektr korxonasi ta’minotni tez fursatlarda qayta tiklashini aytib, noqulayliklar uchun uzr so‘ragan.
Chilonzor hokimligi soat 16:12 da bergan xabarga ko‘ra (mazkur xabar tuman ETK guruhida uchramaydi), Chilonzor tumanining ayrim hududlarini elektr energiyasi bilan ta’minlovchi 35/6 kVli “Chilonzor” podstansiyasiga “Yuksak” podstansiyasidan kirib keluvchi L/4-Yu 35 kV bo‘lgan yuqori kuchlanishli kabel tarmog‘i shikastlanishi natijasida “Chilonzor” podstansiyasi favqulodda avariya holatida o‘chirilgan.
Natijada tumanning 1-Katta Chilonzor, 3-Katta Chilonzor, Chilonzor, qisman Ko‘rkam, qisman Katta Qozirobod, Beshchinor hamda Novza MFYlarining ayrim hududlaridagi aholi yashash xonadonlarida avariyaviy uzilishlar kuzatilmoqda.
ETKning tezkor brigadalari holatni nazoratga olib, nosozlikni bartaraf etish choralarini ko‘ryapti, deyiladi xabarda.
Respublika bo‘ylab 2 soatlik profilaktik uzilishlar
Energetika vazirligining ma’lum qilishicha, O‘zbekiston bo‘ylab elektr uzatish tarmoqlarida o‘ta katta yuklama yuzaga kelishining oldini olish maqsadida 2 soatgacha muddatga qisqa muddatli majburiy cheklovlar joriy etilgan.
“Xususan, Qashqadaryo viloyatining Ko‘kdala va Chiroqchi tumanlaridagi 1750 ta iste’molchi, Jizzax viloyatining Sharof Rashidov va Zomin tumanlaridagi 1200 ta iste’molchi, Xorazm viloyatining Shovot, Gurlan va Qo‘shko‘pir tumanlaridagi 1 300 ta iste’molchi, Toshkent viloyatining Toshkent va Zangiota tumanlaridagi 1000 ta iste’molchi vaqtincha elektr ta’minotidan uzildi”, – deyiladi vazirlik soat 12:39 da bergan xabarda.
Telegram'dagi rasmiy axborot kanallari
Energetika vazirligiga ko‘ra, elektr ta’minotida rejali va rejadan tashqari o‘chishlar haqida har bir tuman elektr ta’minoti korxonasii (ETK) tomonidan tashkil etilgan Telegram-guruhlarda e’lonlar berib borilmoqda.
Xususan, Yunusobod, Yashnobod, Mirzo Ulug‘bek, Chilonzor, Sergeli ETK kabi Telegram-guruhlari orqali muntazam ravishda ma’lumot berib borilyapti.
Xuddi shunday guruhlar Toshkent shahri va Toshkent viloyati hokimliklari tomonidan ham tashkil qilingan.
Tok ishlab chiqarish va iste’mol rekordi yana yangilandi
Vazirlikning qayd etishicha, jazirama issiq sharoitida elektr energiyasi iste’moli ham, ishlab chiqarish hajmi ham tarixiy rekord darajaga yetgan.
O‘zbekiston yagona energetika tizimida yozgi mavsum uchun sutkalik elektr energiyasi iste’moli 16 iyul kuni 291 mln kWhni tashkil etib, yangi rekord qayd etildi. Bu o‘tgan yilgi yozgi mavsumda qayd etilgan eng yuqori ko‘rsatkichdan 18,4 million kWhga yoki 6,7 foizga ko‘p.
16 iyul kuni, shuningdek, sutkalik elektr energiyasi ishlab chiqarish hajmi 295,4 mln kWhni tashkil etib, yangi rekord o‘rnatildi. Bu 15 iyulda qayd etilgan 291,4 mln kWhlik ko‘rsatkichdan 4 mln kWhga yoki 1,37 foizga ko‘p.
