Gurbanguli Berdimuhamedov Turkmaniston-O‘zbekiston hukumatlararo komissiyasining tarkibini tasdiqladi

Turkmaniston prezidenti Gurbanguli Berdimuhamedov bugun yangi qarorni imzoladi, deb xabar bermoqda Turkmenportal.

Qayd etilishicha, hujjat bilan savdo-iqtisodiy, ilmiy-texnikaviy va madaniy hamkorlik bo‘yicha Turkmaniston-O‘zbekiston qo‘shma komissiyasi tarkibining Turkmaniston tomoni tasdiqlandi.

Qaror «Turkmaniston va O‘zbekiston o‘rtasidagi hamkorlikni yanada rivojlantirish, ikki tomonlama savdo-iqtisodiy, ilmiy-texnikaviy va madaniy aloqalarni kengaytirish maqsadida» imzolangani aytiladi.

Bundan oldin, Gurbanguli Berdimuhamedov O‘zbekistonga tashrif buyurishi xabar qilingandi.

Davlat rahbarlari o‘zaro manfaatli hamkorlikni yanada rivojlantirishning istiqbollarini muhokama qiladilar hamda savdo-iqtisodiy, transport-kommunikatsiya va madaniy-gumanitar sohalarda qo‘shma loyihalar amalga oshirilishining borishini ko‘rib chiqadilar.