Mirobod va Sergeli tumanlarida issiqlik ta'minotida uzilish yuz berdi

Joriy yilning 5 dekabr kuni soat 02:45da Mirobod tumanida joylashgan 6-sonli qozonxonadan ta'minlanuvchi 600 diametrli magistral issiqlik tarmog‘idagi avariya natijasida Mirobod va Sergeli tumanlarining ayrim hududlarida issiqlik ta'minotida uzilish sodir bo‘ldi. 

Poytaxt hokimligi xabariga ko‘ra, mavjud issiqlik quvuri muddatini o‘tab bo‘lganligi sababli hozirda uning ta'mirtalab qismi yangisiga almashtirilmoqda. 

Bugun soat 14:00 da aholi xonadonlari yana issiqlik tizimiga ulanishi aytilgan.

Mazkur uzilishlarni tezkorlik bilan bartaraf etishga zarur texnikalar va mutaxassislar jalb etilgani bildirilmoqda.

“Hurmatli hamshaharlar! Sizlardan yuzaga kelgan noqulayliklar uchun uzr so‘raymiz!” - deyiladi hokimlik xabarida.