Qattiq maishiy chiqindi poligonlarini loyihalashtirish va ulardan foydalanish bo‘yicha yo‘riqnoma tasdiqlandi.
Norma’ning yozishicha, hujjatda qattiq maishiy chiqindilarni poligonga qabul qilish tartibi va texnologik sxemasi, shuningdek ularni tashuvchi texnikani bo‘shatish tartibi nazarda tutilgan.
Ma'lumot uchun: qattiq maishiy chiqindilar — jismoniy shaxslarning hayoti va faoliyati hamda yuridik shaxslarning faoliyati natijasida hosil bo‘luvchi organik va noorganik chiqindilar, shuningdek ularning hududida va obodonlashtirish obektlaridagi tabiiy jarayonlar natijasida hosil bo‘luvchi chiqindilar (oziq-ovqat va o‘simlik chiqindilari, to‘qimachilik mahsulotlari, o‘rash-joylash (qadoqlash) materiallari, shisha, rezina, qog‘oz, plastmassa, yog‘och chiqindilari, o‘zining foydalanish xususiyatlarini yo‘qotgan uy-ro‘zg‘or buyumlari, supurindi, shuningdek qattiq yoqilg‘ida ishlovchi maishiy pechkalar va isitish bug‘qozonlaridan foydalanish natijasida hosil bo‘luvchi chiqindilar).
Qattiq maishiy chiqindilar poligonlari qurilishi uchun qishloq xo‘jaligiga mo‘ljallanmagan va o‘rmon fondi yerlariga kirmaydigan yer uchastkalari ajratiladi. Bunda poligonlarning atrof-muhitning turli obektlariga salbiy ta'siri darajasini hisobga olgan holda eng kam ta'sir ko‘rsatuvchi yer uchastkasini tanlash uchun bir necha hududlar muqobil variant sifatida ko‘rib chiqiladi.
Poligonlar shaharlar va boshqa aholi punktlarining tashqarisida joylashtiriladi. Ular istalgan kattalikdagi aholi punktlari uchun tashkil etilishi mumkin, biroq bir biriga yaqin aholi punktlari uchun markazlashgan poligonlarni tashkil etish maqsadga muvofiqdir. Turar joydan poligon chegarasigacha bo‘lgan masofa aholi yashash joylarida atmosfera havosini muhofaza qilish bo‘yicha sanitariya me'yorlari va qoidalariga muvofiq kamida 500 metrni tashkil qilishi kerak.
Poligonlarni suvni muhofaza qilish zonalari, suv obektlarining sanitariya muhofazasi zonalari, sohil bo‘yi mintaqalari va sifatli yer osti suvlari to‘planadigan manbalar tegrasi, kurortlarni muhofaza qilish zonalari, shuningdek fuqarolarning ommaviy dam olish va sog‘lomlashtirish maskanlari hududiga joylashtirilishiga yo‘l qo‘yilmaydi. Yer ajratish to‘g‘risidagi hujjatlar Yergeodezkadastr davlat qo‘mitasi tomonidan rasmiylashtiriladi.
Tuman sanitariya-epidemiologik osoyishtalik markazi tayyorlangan barcha materiallarni inobatga olgan holda tanlangan yer uchastkasining poligon qurilishi uchun yaroqliligi xususida o‘z xulosasini beradi. Keyin ekologik normativlar ishlab chiqiladi va kelishiladi, davlat ekologik ekspertizasi o‘tkaziladi.
