Sessiyada qatnashgan Kun.uz muxbiri muhokama mavzusidan kelib chiqqan holda, mamlakatning Yevrosiyo iqtisodiy ittifoqiga a'zo bo‘lishi ehtimoli o‘rganilayotgani yuzasidan savol berdi.
«Belarus respublikasi rahbariyati, qirg‘izistonlik ishlab chiqaruvchilar va deputatlarning YeOII bo‘yicha bildirayotgan salbiy fikrlari, ittifoqqa a'zolik tufayli ularning iqtisodiyoti zarar ko‘rayotgani haqidagi e'tirozlar o‘zbek ekspertlari guruhi tomonidan qanchalik inobatga olinmoqda?», deya o‘rtaga tashlangan savolga O‘zbekiston Investitsiyalar va tashqi savdo vaziri o‘rinbosari Badriddin Abidov javob berdi.
«Dunyodagi har bitta davlat o‘z strategik maqsadlaridan kelib chiqqan holda u yoki bu xalqaro yoki mintaqaviy savdo kelishuvlari va tashkilotlarga kirishi mumkin. Bu – har bir davlatning suveren huquqi. Bu huquq Jahon Savdo Tashkilotining GATT bitimi 24-moddasida ham belgilangan.
O‘zbekiston Yevroosiyo iqtisodiy ittifoqiga a'zo bo‘lgan ikkita davlat bilan bevosita chegarada joylashgan. Bu esa O‘zbekiston uchun yuqori ahamiyatga ega.
Albatta, bu tashkilotga a'zolikning ijobiy va salbiy jihatlari diqqat bilan o‘rganiladi va o‘rganishlarda albatta milliy manfaatlardan kelib chiqiladi».
Masala yuzasidan siyosiy partiyalar vakillari ham munosabat bildirib o‘tdi.
Dilshodjon Rahmonov, O‘zbekiston Liberal-demokratik partiyasi vakili:
«Albatta, bu mavzu ancha vaqtdan beri muhokamalar markazida turibdi. Agar tahlillarga e'tibor qaratadigan bo‘lsak, iqtisodiy pasayishlarni nafaqat bu tashkilotga, balki boshqa iqtisodiy tashkilotlarga a'zo davlatlarda ham kuzatish mumkin. Masalan, bundan 7-8 yil avval dunyo davlatlarida iqtisodiy o‘sishlar o‘rtacha 7 foiz atrofida bo‘lgan bo‘lsa, hozir 3,1 foiz. Bu – Jahon banki ma'lumotlari.
