Erdo‘g‘an Haftar tarafida yollanma askarlar jang qilayotgani to‘g‘risidagi xabarlardan xavotirda ekanligini aytdi

Turkiya prezidenti Rajab Toyyib Erdo‘g‘an feldmarshal Xalifa Haftarning Liviya milliy armiyasi tarafida yollanma askarlar jang qilayotgan bo‘lishi mumkinligi borasida xavotir bildirdi.

"Ularga (yollanma askarlarga) kim pul to‘layotganini kim biladi. Liviyada shunday vaziyatki, biz kuzatuvchi bo‘lib turishimiz noto‘g‘ri", - dedi Turkiya prezidenti.

Shu bilan birga, Erdo‘g‘an Liviyaga "Misr, BAA, Fransiya va hatto Italiya" qiziqayotganligini aytdi. 

"Hozirda Rossiya ko‘rinmayotgan bo‘lsa-da, u yerda Rossiya tuzgan harbiy kompaniya bor. Amerikaning bunday kompaniyalari juda ko‘p. Masalan, sobiq harbiylardan tashkil topgan bunday kompaniyalar Afg‘onistonda mavjud. Ularga katta pul to‘lashyapti va ular Afg‘onistonda noqonuniy jang qilishmoqda", - dedi Erdo‘g‘an.

Hozirda Liviyada bir vaqtning o‘zida ikkita ijro hokimiyati: Foiz Sarajning xalqaro darajada tan olingan Milliy kelishuv hukumati va parlament hamda Liviya milliy armiyasi tomonidan qo‘llab-quvvatlanayotgan Abdulla Abdurahmon at-Taniyning vaqtinchalik hukumati mavjud.