17-20 dekabr kunlari davlat tashrifi bilan Yaponiyada bo‘lgan O‘zbekiston prezidenti Shavkat Mirziyoyev 20 dekabr kuni Rossiyaning Sankt-Peterburg shahriga tashrif buyurdi.
«Pulkovo» xalqaro aeroportida davlat rahbarini Leningrad viloyati gubernatori Aleksandr Drozdenko va boshqa rasmiy shaxslar kutib oldi.
Shavkat Mirziyoyev Sankt-Peterburgda Mustaqil Davlatlar Hamdo‘stligiga a'zo mamlakatlar rahbarlarining norasmiy uchrashuvida ishtirok etadi. MDH davlatlari yetakchilari ko‘p tomonlama hamkorlikning holati va uni rivojlantirish istiqbollari yuzasidan fikr almashadi.
Eslatib o‘tamiz, 2020 yilda Hamdo‘stlikda O‘zbekiston Respublikasi raislik qiladi.
