«O‘zbekiston temir yo‘llari» AJ tomonidan Qamchiq dovoni yo‘nalishidan foydalanadigan barcha yo‘lovchilarga qulaylik yaratish maqsadida 2019 yil 21 dekabr kuni yana bitta qo‘shimcha poyezd qatnovi yo‘lga qo‘yildi.
62/61-sonli Toshkent – Qo‘qon – Toshkent yo‘nalishida harakatlanadigan qo‘shimcha poyezd bugun, 21 dekabr kuni soat 22:40da Toshkent-Janubiy vokzalidan jo‘naydi, 22 dekabr kuni soat 03:17da Qo‘qon vokzaliga yetib boradi.
22 dekabr kuni tonggi soat 04:05da esa mazkur poyezd Qo‘qon – Toshkent yo‘nalishida harakatlanadi va shu kuni soat 08:55da Toshkent-Janubiy vokzaliga kirib keladi.
Bildirilishicha, joriy etilgan qo‘shimcha yo‘lovchi poyezdlari Toshkent - Andijon - Toshkent yo‘nalishidagi mavjud yo‘lovchi poyezdlar harakat jadvaliga ta'sir etmaydi.
Bundan oldin, «Toshkent - Angren - Orzu - Pop - Toshkent» yo‘nalishida vaqtinchalik qo‘shimcha poyezd qatnovi yo‘lga qo‘yilgandi.