Alisher Qodirov: «Bu saylovda hech kim yutmadi»

22 dekabr kuni Oliy Majlis Qonunchilik palatasiga o‘tgan saylovlarda egallangan deputatlik o‘rni bo‘yicha partiyalar o‘rtasidagi farq katta emas, deb hisoblaydi «Milliy tiklanish» demokratik partiyasi yetakchisi Alisher Qodirov.

{Yii::t(}

O'tkazib yuborish 6s

O'tkazib yuborish

Kun.uz muxbiri saylov yakunlari bo‘yicha bo‘lib o‘tgan matbuot anjumanidan so‘ng Alisher Qodirov bilan suhbatda bo‘ldi.

«O‘tgan saylovlarga nisbatan olingan ovozlarni tahlil qilib ko‘ring. Men bu saylovlarda hech qaysi partiya yutmadi, deb hisoblayman. Chunki saylovchilar tomonidan berilgan signal aniq ishonch hech kimga berilmaganini ko‘rsatdi. Bundan to‘g‘ri xulosa qilish kerak.

Shuncha harakatlarga qaramay, saylovchilarga ishonchni, aniq signallarni berolmaganimiz – bu bizning aybimiz. Lekin ijobiy holat sifatida shuni qabul qilish ham kerakki, parlamentda yetakchi kuch sifatida saylovchi hech kimni aniq ajratib ko‘rsatmayapti.

Bunda saylovchilarimizning optimistik ruhini ham to‘g‘ri tushunishimiz kerak. Lekin bir narsa aniq: parlament o‘zgaradi.

Bu parlament avvalgilaridan aniq fikrlar maydoni, aniq fikrlar to‘qnashuvi va saylovchining manfaatlari uchun kurashadigan parlament bo‘lishi bilan farq qiladi», – deydi partiya yetakchisi.

Qodirov shuningdek, bu saylovlarda O‘zbekiston Liberal demokratik partiyasi yutishi avvaldan aniqmidi, mazmunidagi savolga ham javob qaytardi.

«Yo‘q, biz to‘liq ustuvorlik uchun kurashdik. Biz yetakchi partiya bo‘lish uchun kurashdik va hali bu umidimizdan voz kechganimiz yo‘q. Kechagi saylovlardan keyin ham 22ta okrugda saylovlarning davom etayotganligi biz uchun yetarli imkoniyat».

Eslatib o‘tamiz, 150ta saylov uchastkasidan 128tasida bo‘lib o‘tgan deb hisoblanayotgan saylov natijalariga ko‘ra, Qonunchilik palatasida O‘zLiDeP – 43ta, «Milliy tiklanish» 35ta o‘rinni egalladi.

«Adolat» SDPning 21, Xalq demokratik partiyasining 18 nafar nomzodi parlamentga o‘tgan bo‘lsa, Ekologiya partiyaning 11 a'zosi parlament deputatiga aylandi.