O‘zbekistonda ma'naviy tarbiyani baholash uchun ilmiy asoslangan indikatorlar joriy etiladi

Bu Vazirlar Mahkamasining 2019 yil 31 dekabrdagi «Uzluksiz ma'naviy tarbiya konsepsiyasini tasdiqlash va uni amalga oshirish chora-tadbirlari to‘g‘risida»gi 1059-son qarorida belgilangan.

Konsepsiyani amalga oshirishning ustuvor yo‘nalishlaridan biri – aholining farzand tarbiyasi bo‘yicha bilimlarini, pedagogik madaniyatini oshirish, fuqarolarni uzluksiz ma'naviy tarbiyaning jahon tajribasida sinovdan o‘tgan samarali pedagogik texnologiyalari, usullari va amalga oshirish shakllari bilan muntazam tanishtirib borish.
 
Konsepsiyaning maqsadi - yosh avlodda mustaqil va baxtli hayot uchun zarur ijtimoiy malaka hamda fazilatlarni yoshiga mos, bosqichma-bosqich shakllantirish.
 
Ma'naviy-axloqiy tarbiyani baholashning ilmiy asoslangan indikatorlarini ishlab chiqish vazifasi qo‘yildi. Homiladorlik davridan boshlanadigan va 30 yoshga to‘lguniga qadar davom ettiriladigan uzluksiz ma'naviy tarbiyani amalga oshirishda ota-onalar, tarbiyachilar, o‘qituvchilar va mahallaning rolini oshirish nazarda tutilmoqda.
 
Konsepsiya quyidagi to‘rt davrni qamrab oladi:

I – oilalarda (homila davri, bola tug‘ilganidan 3 yoshgacha bo‘lgan davr);

II – maktabgacha ta'lim 3-6 (7) yoshgacha bo‘lgan davr;

III – umumiy o‘rta ta'lim tizimida (7 (6)-10 yosh - boshlang‘ich sinf, 11-17 yosh - o‘rta va yuqori sinflar);

IV – o‘rta maxsus kasb-hunar va oliy ta'lim muassasalari tizimida ta'lim oluvchilar, shuningdek ishlab chiqarishda faoliyat ko‘rsatayotgan va band bo‘lmagan yoshlar.
 
Hujjat 3.01.2020 yildan kuchga kirdi.