Otasiga qo‘pol munosabatda bo‘lgan erkakka 7 sutkalik ma'muriy qamoq jazosi qo‘llandi 

Avvalroq internetda keksa otasi bilan qo‘pol munosabatda bo‘layotgan erkak videosi tarqalgandi.

Ma'lum qilinishicha, videodagi voqea o‘rganilib, u 9 fevralda yuz bergani aniqlangan. 51 yoshli M.A. salomatligidagi muammolar sababli o‘zi mustaqil harakatlana olmaydigan 86 yoshli otasini turtib, uni koyigan. 

Mirzo Ulug‘bek tumani Ichki ishlar organlari faoliyatini muvofiqlashtirish boshqarmasi xodimlari mahalla fuqarolar yig‘ini vakillari bilan birgalikda M.A. bilan tushuntirish ishlari olib borishgan va erkakka keksa otasiga qarashda yordam ko‘rsatilishiga va'da berishgan. 

Mirzo Ulug‘bek tumanining ma'muriy sudi M.A.ni O‘zbekiston Respublikasi Ma'muriy javobgarlik to‘g‘risidagi kodeksining 183-moddasida (Mayda bezorlik) ko‘zda tutilgan ma'muriy huquqbuzarlikni sodir etishda aybdor deb topib, unga 7 sutkalik ma'muriy qamoqqa olish jazosini tayinlagan.