AQSh hukumati O‘zbekistonga mamlakatning koronavirusga qarshi kurashdagi sa'y-harakatlarini qo‘llab-quvvatlash maqsadida 600 dona shaxsiy himoya vositalari to‘plamini topshirdi.
AQSh elchixonasi saytida ma'lum qilinishicha, 20 fevralda AQShning Toshkentdagi elchixonasi xodimlari O‘zbekiston Respublikasi Sog‘liqni saqlash vazirligining Respublika o‘lat, karantin va o‘ta xavfli yuqumli kasalliklar muhofazasi markaziga to‘plamlarni yetkazib berishgan.
Elchixona ma'lumotlariga ko‘ra, yanvarda O‘zbekiston Respublikasi Sog‘liqni saqlash vazirligi barcha xalqaro donorlarga shaxsiy himoya vositalari va koronavirus diagnostikasi uchun test-to‘plamlar yetkazib berish iltimosi bilan murojaat qilgan.
Bu murojaatga javoban AQShning Mudofaa xavfini kamaytirish agentligi (DTRA) 600 dona shaxsiy himoya vositalari to‘plami, jumladan yuz uchun niqoblar, kombinezonlar, plastik niqoblar, respiratorlar va qo‘lqoplar xarid qilish uchun mablag‘ ajratgan.
