11:40 / 28.02.2020
0
1893
Ўзбекистон 2023 йилда ЕТТБ бошқарув кенгаши йиллик йиғилишини Самарқандда ўтказишни таклиф қилди

Лондонда Европа тикланиш ва тараққиёт банки директорлари кенгашининг махсус йиғилиши бўлиб ўтди

Фото: Инвестициялар ва ташқи савдо вазирлиги матбуот хизмати

Лондонда бўлиб ўтган Европа тикланиш ва тараққиёт банки (ЕТТБ) директорлари кенгашининг махсус йиғилишида Ўзбекистон томонидан ЕТТБ бошқарувчиси – инвестициялар ва ташқи савдо вазири Сардор Умурзоқов ЕТТБ билан ҳамкорликнинг долзарб масалалари ва уни кенгайтириш таклифлари билан мурожаат қилди.

Вазирлик хабарига кўра, тақдимот давомида ўтказилган парламент сайловлари муносабати билан Ўзбекистондаги ўзгаришларнинг асосий йўналишлари, ижтимоий-иқтисодий соҳада таркибий ислоҳотларни амалга ошириш борасидаги ютуқлар, халқаро молия институтлари, хусусан, ЕТТБ билан ҳамкорликнинг таҳлили ёритилди.

Шунингдек, мурожаатда Ўзбекистоннинг ЕТТБни ўрта муддатли истиқболда стратегик ривожлантиришга оид асосий масалалари бўйича позицияси акс эттирилди ва шу нуқтаи назардан, Ўзбекистон ва ЕТТБ ўртасидаги ҳамкорлик самарадорлигини устувор тармоқларда янги иқтисодий ва ижтимоий аҳамиятга эга бўлган лойиҳалар ҳажмининг кўпайтириш орқали тубдан ошириш зарурати асослантириб берилди.

Мурожаат доирасида 2023 йилда ЕТТБ бошқарув кенгашининг йиллик йиғилишини Самарқанд шаҳрида ўтказиш таклифи тақдимот қилинди. Бу таклиф кенгаш аъзолари ва банк раҳбариятининг ижобий реакциясига сабаб бўлди – бугунги кунда Самарқанд барча мезонлар бўйича ушбу тадбирни ўтказиш ҳуқуқига асосий даъвогарларидан бири бўлиб қолмоқда, дейилади хабарда.

Саволлар ва изоҳлар бўйича кейинги сессиялар давомида кенгаш аъзолари томонидан Ўзбекистондаги ташаббус ва ўзгаришларни, шу жумладан устувор тармоқларни ислоҳ қилиш орқали иқтисодиётни либераллаштириш, давлат корхоналарини хусусийлаштириш жараёнларини бошлаш, Жаҳон савдо ташкилотига аъзо бўлиш бўйича фаол иш олиб бориш орқали глобал иқтисодий маконга интеграциялашиш ва минтақавий ҳамкорликни кучайтиришни ҳар томонлама қўллаб-қувватлашлари билдирилди.

Йиғилиш якунида Ўзбекистон томонидан илгари сурилган таклифлар банк президенти Сума Чакрабарти томонидан қўллаб-қувватланди ва директорлар кенгаши аъзолари томонидан бир овоздан қабул қилинди.

Шунингдек, Хоразм вилоятида давлат аҳамиятидаги умумий фойдаланиш автомобил йўлларини қуриш ва реконструкция қилиш учун Ўзбекистон Республикасига узоқ муддатли молиялаштириш тақдим қилиш тўғрисидаги келишувни имзолаш маросими бўлиб ўтди.

ЕТТБ штаб-квартирасида ишлайдиган ватандошлар билан алоҳида учрашув бўлиб ўтди, очиқ мулоқот шаклида Ўзбекистондаги ислоҳотлар жараёни, халқаро молия институтлари, шу жумладан ЕТТБ билан инвестициявий ҳамкорликни кенгайтириш истиқболлари, давлат тузилмалари ва идоралари фаолиятини такомиллаштириш масалалари муҳокама қилинди. 

Ушбу хабарга фикрингизни билдиринг. Бунинг учун авторизациядан ўтишингиз керак!
Top