Toshkent shahrida raqamli texnologiyalar keng joriy etiladi - Prezident qarori

Prezident “Toshkent shahrida raqamli texnologiyalarni keng joriy etish chora-tadbirlari to‘g‘risida”gi qarorni imzoladi.

Vazirlar Mahkamasi, Axborot texnologiyalari va kommunikatsiyalarini rivojlantirish vazirligi va Toshkent shahar hokimligining “Raqamli Toshkent” kompleks dasturini amalga oshirish bo‘yicha taklifiga rozilik berildi.

Quyidagilarni nazarda tutuvchi “Raqamli Toshkent” kompleks dasturi:

2020-2021 yillarda joriy etiladigan axborot tizimlari va dasturiy mahsulotlar ro‘yxati;

“Raqamli Toshkent” kompleks dasturini amalga oshirish bo‘yicha chora-tadbirlar rejasi;

2020 yilda telekommunikatsiya infratuzilmasini kengaytirish bo‘yicha loyihalar ro‘yxati;

2021-  2023 yillarda istiqbolli axborot tizimlari va dasturiy mahsulotlar ro‘yxati tasdiqlandi.

Dasturning asosiy vazifasi etib shahar xizmatlarini boshqarish, ijtimoiy soha obektlari, ishlab chiqarish, yo‘l transport va kommunal infratuzilmaning integratsiyalashgan axborot muhitini yaratish va keyinchalik muvaffaqiyatli tajribani respublikaning boshqa hududlarida tatbiq etish belgilandi.

Dasturga asosan 2020 yilda quyidagilar amalga oshiriladi:

1 mayga qadar avia, temir yo‘l va boshqa transport xizmatlariga elektron chiptalarni onlayn sotib olish yagona axborot tizimini joriy etish;

1 sentyabrga qadar barcha umumta'lim maktablarida jurnal va o‘quvchilarning kundaliklarini qog‘oz shaklida yuritishni bekor qilish hamda ularni elektron tarzda yuritishga mo‘ljallangan yagona axborot tizimini ishga tushirish;

1 noyabrga qadar kommunal xizmatlar (tabiiy gaz, elektr energiyasi, ichimlik suvi va issiq suv) bo‘yicha to‘lovlarni onlayn to‘lash hamda kommunal xizmat ko‘rsatuvchi tashkilotlar bilan elektron hamkorlikni ta'minlovchi “Mening uyim” yagona axborot tizimini joriy etish;

1 dekabrga kadar “Yagona elektron tibbiy karta” axborot tizimini joriy etish va “Elektron poliklinika” axborot tizimiga 62 ta oilaviy poliklinikani ulash.

Quyidagilar:

a) Toshkent shahar hokimligi ta'sischiligida mas'uliyati cheklangan jamiyati shaklida Raqamli rivojlanish departamenti tashkil etildi va quyidagilar uning asosiy vazifalari etib belgilandi:

shaharning geografik axborot-tahlil tizimini yaratish;

davlat organlari va tashkilotlarining axborot tizimlarini, ma'lumotlar bazalarini va boshqa axborot manbalarini yagona dasturiy platforma orqali Toshkent shahar hokimligining axborot tizimlari bilan integratsiyasini ta'minlash;

Dasturning o‘z vaqtida va sifatli bajarilishi, Toshkent shahar hokimligi axborot tizimlarida ma'lumotlarning himoyasi va saqlanishini ta'minlash bo‘yicha samarali ishlarni tashkil etish;

axborot tizimlari va dasturiy mahsulotlarni tijoratlashtirish, xalqaro moliya institutlari va xorijiy tashkilotlarning kreditlari va grantlari, shuningdek, qonunchilikda taqiqlanmagan boshqa manbalarni jalb qilish;

b) Departament tuzilmasida tarmoq Loyiha ofislari tashkil etildi va ularning asosiy vazifalari etib quyidagilar belgilandi:

Dastur doirasida amalga oshirilayotgan loyihalarning konsepsiyalari, loyiha va texnik hujjatlarini ishlab chiqish, tegishli yo‘nalishlardagi axborot tizimlari, ma'lumotlar bazalari va dasturiy mahsulotlarga xizmat ko‘rsatish;

shahar xizmatlarining raqamli ma'lumotlarini birxillashtirish va ularning Dasturga integratsiyalashuvi, davlat organlari va tashkilotlarining axborot tizimlari va dasturiy mahsulotlarida yagona identifikator va tasniflagichlarni joriy qilish hamda ulardan foydalanish;

v) Departament huzurida “Raqamli poytaxt” axborot-tahlil markazi tashkil etildi va quyidagilar uning asosiy vazifalari etib belgilandi:

shahar xizmatlarida axborot tizimlarining idoralararo elektron hamkorligi natijasida olingan ma'lumotlarni tahlil qilish va qayta ishlash;

shahar atrof-muhitini rivojlantirishda tizimli muammolarni aniqlash, shahar xizmatlari samaradorligini oshirish va umuman, shahar muhitini yaxshilash bo‘yicha takliflarni ishlab chiqish.

Joriy yilning 1 aprelidan boshlab quyidagi yig‘imlar va jarimalar Toshkent shahar mahalliy budjetiga o‘tkaziladi:

a) to‘liq miqdorda:

Toshkent shahrida tashqi reklama obektlarida (konstruksiyalarida) tashqi reklamani joylashtirish (tarqatish) huquqi uchun oylik yig‘im, tashqi reklama obektlari uchun reklama joylari pasportlarini berishdan tushadigan mablag‘lar hamda tashqi reklama obektlarini qurish huquqi uchun elektron auksion yakunlari bo‘yicha to‘langan mablag‘lar (auksion savdolarini o‘tkazganlik uchun savdo tashkilotchisiga to‘lanadigan mablag‘ chegirib qolingan holda);

Toshkent shahrida tashkil etilgan yo‘l chetida pullik vaqtincha avtomobil to‘xtab turish joylarida to‘xtab turish qoidalari buzilganligi uchun jarimalar;

b) Toshkent shahrida maxsus avtomatlashtirilgan foto va videofiksatsiya texnika vositalari qayd etgan yo‘l harakati qoidalari buzilganligi uchun jarimalarning 80 foizi, qolgan 20 foizi esa - Toshkent shahar Ichki ishlar bosh boshqarmasining budjetdan tashqari rivojlantirish jamg‘armasiga.

Toshkent shahar hokimligining Ijro apparati tuzilmasiga axborot texnologiyalarini joriy etish bo‘yicha hokim o‘rinbosari - Departament rahbari lavozimi kiritildi.

Belgilanishicha, vazirliklar va boshqa davlat organlari rahbarlarining axborot-kommunikatsiya texnologiyalarini rivojlantirish uchun mas'ul bo‘lgan o‘rinbosarlari Departament va Loyiha ofislari bilan samarali hamkorlik qilish uchun shaxsan javobgardir.

Belgilab qo‘yilishicha, Dastur doirasida:

Loyihaoldi o‘rganishlar, loyihani amalga oshirish bo‘yicha konsepsiya va texnik topshiriqlarni ishlab chiqish Loyiha ofislari tomonidan amalga oshiriladi;

Loyiha-texnik hujjatlarining ekspertizasi faqat Axborot texnologiyalari va kommunikatsiyalarini rivojlantirish vazirligi va “Kiberxavfsizlik markazi” DUK tomonidan o‘tkaziladi;

Axborot tizimlari va dasturiy mahsulotlar ishlab chiquvchilarni va integratorlarni jalb qilish, ular bilan shartnomalar tuzish Departament tomonidan tanlov orqali amalga oshiriladi;

Departament axborot tizimlari va dasturiy mahsulotlar ishlab chiquvchilar va integratorlar bilan 1 milliard so‘mgacha bo‘lgan miqdorda loyihalar bo‘yicha Dasturiy mahsulotlar va axborot texnologiyalari texnoparki rezidentlari o‘rtasida tanlov o‘tkazish yo‘li bilan shartnoma imzolash huquqiga ega.

Shunday tartib o‘rnatiladiki, unga ko‘ra:

a) 2020 yil 1 sentyabrdan axborot tizimlari va dasturiy mahsulotlarni ishlab chiqishda davlat organlari va tashkilotlari quyidagilarga majburdirlar:

Axborot texnologiyalari va kommunikatsiyalarini rivojlantirish vazirligi tomonidan tasdiqlangan yagona texnologik yechimlar, tasniflagichlar va standartlardan foydalanish:

dasturiy mahsulotlarni joriy etishda asosan lnsenziyalash cheklovlaridan xoli yagona ochiq formatdagi elektron hujjatlardan foydalanishni ta'minlash;

tasdiqlangan tegishli milliy standartlar va texnik talablarga muvofiq apparat-dasturiy tizimlarni o‘rnatish;

b) 2020 yil 1 maydan davlat organlari va tashkilotlarining axborot tizimlari va resurslarida axborotni shakllantirish, saqlash va qayta ishlash faqat quyidagi noyob identifikatorlardan foydalangan holda amalga oshiriladi:

jismoniy shaxslar - jismoniy shaxsning shaxsiy identifikatsiya raqami (JShShIR);

yuridik shaxslar - soliq to‘lovchining identifikatsiya raqami (STIR);

ko‘chmas mulk - kadastr raqami;

manzillar - geografik kod;

transport vositalari - transport vositasining identifikatsiya raqami.

Toshkent shahar hokimligi, Axborot texnologiyalari va kommunikatsiyalarini rivojlantirish vazirligi 2020 yil 1 mayga qadar shahar infratuzilmasining holati, davlat xizmatlarining sifati va aholini qiziqtirgan boshqa masalalar yuzasidan jamoatchilik nazoratini tashkil etish uchun “Xalq nazorati” portali va mobil ilovasini ishga tushiradi.