11:11 / 20.03.2020
8465
«Ҳайдовчи қайта имтиҳондан ўтишга йўналтирилди». 63-автобусдаги ҳолат бўйича изоҳ берилди

Ҳайдовчи автобусдаги GPS назорат тизимини қасддан ўчириб, масофани қисқа муддатда босиб ўтиш мақсадида тезликни оширган

Фото: Тошшаҳартрансхизмат

Жорий йилнинг 17 март куни 2-автосарой тасарруфидаги 63-йўналишда қатновчи, саф рақами 70 бўлган автобуснинг тезлигини ҳаддан оширгани ва кескин тўхташга ҳаракат қилгани йўловчиларнинг норозилигини келтириб чиқарди ва ижтимоий тармоқларда муҳокамаларга сабаб бўлди.

“Тошшаҳартрансхизмат” хабарига кўра, мутасаддилар мазкур воқеани ўрганганларида, ҳайдовчи К.Р автобусдаги GPS назорат тизимини қасддан ўчириб, масофани қисқа муддатда босиб ўтиш мақсадида тезликни оширгани, йўлдаги ноқулай вазият сабаб кескин тўхташга ҳаракат қилгани натижасида чиптачининг автобус салонида йиқилгани маълум бўлди.  

Билдирилишича, ушбу хатти-ҳаракат атрофлича ўрганилиб, ҳайдовчи Йўл ҳаракати хавфсизлиги бошқармасидан йўл ва йўловчи ташиш қоидалари бўйича қайта имтиҳондан ўтишга йўналтирилди.

“Ҳурматли йўловчи! Агарда сиз мазкур ҳолат каби қоидабузарликларга дуч келсангиз, зудлик билан жамиятнинг 1062 ишонч рақамига қўнғироқ қилинг! Зеро, йўловчи ҳаётини хавфга солишга ҳеч кимнинг ҳаққи йўқ!” - дейилади маълумотда. 

Top