Parkentda talonchilik sodir bo‘ldi, 3 nafar shaxs ushlandi

2020 yilning 16 mart kuni soat 10:30da 29 yoshli Q.N., 24 yoshli X.E. va 22 yoshli A.T. o‘zaro jinoiy til biriktirib, Toshkent viloyati Parkent tumani, Zarkent qishlog‘i hududidan o‘tuvchi “Zarkent-Parkent” avtomobil yo‘lining chekka qismida 38 yoshli U.Sh.ga hayot va sog‘liq uchun xavfli bo‘lmagan zo‘rlik ishlatgan.

O‘zbekiston Respublikasi IIV huzuridagi Tergov departamenti xabariga ko‘ra, bu shaxslar fuqaroga tegishli bo‘lgan bahosi 2 000 000 so‘mlik LG rusumli uyali aloqa vositasini, 2 000 AQSh dollari hamda 500 000 so‘m naqd pullarini talon-toroj qilib, hodisa joyidan yashiringan.

Mazkur holat yuzasidan Parkent tumani IIB huzuridagi Tergov bo‘limi tomonidan O‘zbekiston Respublikasi Jinoyat kodeksining 166-moddasi 2-qismi “a,v” bandlari (talonchilik) bilan jinoyat ishi qo‘zg‘atilgan. Tergov jarayonida X.E.dan ashyoviy dalil tariqasida LG rusumli uyali aloqa vositasi olingan.

Jinoyat ishi yuzasidan A.T., Q.N. va X.E. ayblanuvchi tariqasida jalb qilinib, ularga nisbatan “qamoqqa olish” tarzidagi ehtiyot chorasi qo‘llanilgan.