17:29 / 30.03.2020
41174

Foto: Andijonda karantindagi uylar darvozasiga maxsus belgi yopishtirib chiqildi

Ayni paytda Andijon viloyatida 2400ta xonadon va ularda yashovchi 16 ming fuqaro uy karantiniga olingan.

Foto: KUN.UZ

Viloyat IIBdan ma'lum qilishlaricha, xorijdan kelganlar va ularning qarindoshlari istiqomat qilayotgan xonadon vakillari uy karantiniga olinib, ularning karantin qoidalariga qat'iy rioya qilishi nazorat qilinmoqda.

Andijon viloyat IIB Huqubuzarliklar profilaktikasi boshqarmasi tashabbusi bilan profilaktika inspektorlari tomonidan 1735ta tibbiy kuzatuvga olingan xonadonlarga «Karantin qoidalariga rioya qiling!» maxsus belgilari yopishtirib chiqildi.

Eslatib o‘tamiz, 29 mart kunning birinchi yarmida berilgan xabarda Andijonda koronavirus bemorlari soni 3 nafar ekani aytilgandi. Ma'lum qilinishicha, er-xotin (ularning ikkisi ham shifokor) va ularning talaba qizida infeksiya tasdiqlangan.

Andijon viloyati hokimligi ma'lumotiga ko‘ra, kasallik tashxisi qo‘yilgan ayol 10 mart kuni Qirg‘izistonning O‘sh shahriga borib, 11 mart kuni qaytgan. Oilaning O‘sh shahrida tibbiyot institutida o‘qiydigan qizi ham shu shaharda 10-18 mart kunlari bo‘lib, Andijonga qaytgan.

Bugun, 30 martda 2 nafar andijonlik ayolga koronavirus tashxisi qo‘yildi.

Mavzu
Koronavirus O‘zbekistonda
15 mart kuni O‘zbekistonda koronavirusga chalingan ilk bemor aniqlandi.
Barchasi
Top