Andijonda 4 nafar egizak – uch nafar o‘g‘il va bir qizaloq dunyoga keldi. Bu haqda Sog‘liqni saqlash vazirligi matbuot xizmati xabar berdi.
«Respublika ixtisoslashtirilgan ona va bola salomatligi ilmiy-amaliy tibbiyot markazi Andijon viloyati filialida 4 nafar egizak dunyoga keldi», deyiladi xabarda.
Qayd etilishicha, Andijon shahridagi «G‘ayrat» mahalla fuqarolar yig‘inida istiqomat qiluvchi Odinaxon Muhammadjonova 2 iyun kuni ko‘p homilalik tashxisi bilan mazkur muassasaga qabul qilinadi.
Oradan bir necha kun o‘tib, muddatidan ilgari tug‘uruq tashxisi bilan kesarcha kesish amaliyoti bajarilgan.
Tug‘uruq jarayoni filialning malakali akusher-ginekolog, neonatolog va reanimatologlari tomonidan muvaffaqiyatli o‘tkazilgan.
- Birinchi chaqaloq – o‘g‘il, vazni 2415 gr, bo‘yi 44 sm.
- Ikkinchi chaqaloq – o‘g‘il, vazni 1730 gr, bo‘yi 37 sm.
- Uchinchi chaqaloq – o‘g‘il, vazni 2405 gr, bo‘yi 44 sm.
- To‘rtinchi chaqaloq – qiz, vazni 1885 gr, bo‘yi 39 sm.
Ayni paytda ona va chaqaloqlar ahvoli yaxshi, ular shifokorlar nazoratida.
