Fransiyadan keltirilgan 850 tup shaftoli ko‘chati yoqish yo‘li bilan yo‘q qilindi

Laboratoriya xulosasiga ko‘ra, 850 tup shaftoli (jumladan nektarin) ko‘chatida «Bo‘rtma nematodasi»  va «Janub bo‘rtma nematodasi»  kabi zararli organizmlar mavjudligi aniqlandi.

Bo‘rtma nematodalar (Meloidogyne ) – o‘simliklarda parazitlik qiluvchi nematodalar oilasiga kiradi. Ular turli o‘simliklarning yer ostki qismida parazitlik qilib, shish (bo‘rtma) hosil qiladi. Ayniqsa, pomidor, bodring, sabzi, piyoz, g‘o‘za ekinlari, gilos, o‘rik va boshqa turdagi mevali daraxtlarni kuchli zararlaydi. Ayni paytgacha dunyo bo‘yicha bo‘rtma nematodalar bilan 2 ming turga yaqin turli oilaga mansub madaniy va yovvoyi o‘simliklar zararlanishi aniqlangan bo‘lib, bu holat yil sayin ortib bormoqda. Bo‘rtma nematoda nafaqat mavjud hosilni nobud qiladi, balki sug‘orish, texnika va tuproq orqali boshqa dalalarga ham tarqaladi.

O‘zbekiston Respublikasining «O‘simliklar karantini to‘g‘risida»gi qonuniga muvofiq, mamlakatimizga olib kirilayotgan karantin ostidagi har bir mahsulot fitosanitar talablarga to‘liq javob berishi lozim.

Belgilangan qonun talablari asosida kasallik aniqlangan shaftoli ko‘chatlari «Xorazm TIF»  O‘simliklar karantini chegara maskani inspektorlari hamda tegishli tashkilotlarning mas'ul xodimlari ishtirokida yoqish yo‘li bilan yo‘q qilindi.

Shu o‘rinda aytish lozimki, tadbirkorlar karantin ostidagi har bir mahsulotni O‘zbekistonga olib kirishi uchun karantin ruxsatnomasi hamda eksport qiluvchi mamlakatning o‘simliklar karantini bo‘yicha davlat organlari tomonidan beriladigan fitosanitariya sertifikati yoki guvohnomasini olishi shart. Zero, fitosanitar qoidalarga qat'iy amal qilinsagina, mamlakatimiz ekinzorlari, bog‘-rog‘lari hamda dala maydonlari zararlanishining oldi olinadi.