Britaniyada Nazarboyevlarga tegishli 100 mln dollarlik ko‘chmas mulkdan taqiq olindi

Nazarboyevning qizi Darig‘a Nazarboyeva va nabirasi Nurali Aliyev Britaniya milliy kriminal agentligi (NCA) bilan “asoslanmagan boylik” bo‘yicha sudni yutib chiqqan. Bu haqda Financial Times nashri xabar berdi. 

Qirollik oliy sudi Darig‘a Nazarboyeva va Nurali Aliyevni aybsiz deb topgan. Ularga nopok topilgan pullarga olingan 80 mln funt sterlinglik (100 mln dollar) ko‘chmas mulkka egalik qilish ayblovi qo‘yilgandi. Ta'kidlanishicha, NCA sudning bu qarori ustidan shikoyat qilmoqchi.

Sudya Nazarboyevlarni ko‘chmas mulk uchun pul to‘lay oladigan darajada badavlat deb ta'kidlab o‘tgan. Shuningdek, ular oxirgi yillarda Darig‘a Nazarboyevaning sobiq turmush o‘rtog‘i, 2015 yilda vafot etgan Rohat Aliyev bilan deyarli muloqot qilmaganlari o‘rnatilgan. NCA tergovchilari taxminicha, ko‘chmas mulk Aliyevning jinoiy faoliyatidan olingan pullarga xarid qilingan.

11 mart kuni Nazarboyevlarga tegishli Londondagi uchta ko‘chmas mulkka - Bishops-avenyudagi 39 mln funt sterlinglik uyga, Chelsidagi 32 mln funt sterlinglik kvartiraga va Xaygeytdagi 9 mln funt sterlinglik uyga taqiq qo‘yilgandi.