Chernobil hududidagi yong‘in o‘chirildi

Ammo o‘t o‘chiruvchilarga cho‘g‘larning alangalanishini oldini olish uchun yana bir necha kun kerak, deb xabar berdi Ukraina prezidenti Vladimir Zelenskiy sayti.

13 aprel kuni kuchli shamol tufayli vaziyat og‘irlashgan va yong‘inni nazorat qilish murakkablashgan edi. Olovni o‘chirish uchun juda ko‘p texnika va ichki tarkib a'zolari jalb qilindi. Natijada, olovning harbiy o‘q-dorilar omborlariga, «Ukritiye» va «Vektor» inshootlariga, taqsimlovchi elektrostansiyaga va radioaktiv chiqindilar omboriga o‘tib ketishiga yo‘l qo‘yilmadi.

Yong‘inning o‘chirilgani haqida Ukraina davlat ekologiya inspeksiyasi rahbari vazifasini bajaruvchi Yegor Firsov ham e'lon qildi. «Qisqacha aytadigan bo‘lsak, yong‘in o‘chirildi, yomg‘ir ham yordam berdi. Radiatsiya foni doimiy tarzda o‘lchanmoqda, ammo bizdagi ma'lumotlar hammasi me'yorda ekanini ko‘rsatyapti», deb yozdi mulozim «feysbuk» sahifasida.

Eslatib o‘tamiz, Chernobilning taqiq hududidagi yong‘in 4 aprel kuni boshlangan edi. Favqulodda holat markazida radiatsiya foni ko‘tarilgani haqida ham xabar berilgandi.