AQSh xorij ekspertlari Uhandagi laboratoriyaga kiritilishiga ruxsat berilishini kutmoqda

Vashington Xitoy hukumati xorij mutaxassislarining Uhandagi laboratoriyaga kirishlariga ruxsat berishini kutmoqda. Bu haqda AQSh davlat kotibi Maykl Pompeo Fox Business telekanaliga bergan intervyusida aytdi.

Foto: Artem Geodakyan/TASS

"Biz virus tarqalishi qayerdan boshlanganligini aniqlash uchun Xitoy kommunistik partiyasidan ushbu virusologiya laboratoriyasiga ekspertlar kirishiga ruxsat berishini so‘ramoqdamiz", - dedi Pompeo. Uning so‘zlariga ko‘ra, "bu yerda gap siyosatda emas, balki fan va epidemiologiyada".

Pompeo shuningdek, bu laboratoriyaga G‘arb mamlakatlari mutaxassislari kiritilmaganiga e'tibor qaratdi. AQSh davlat kotibining fikricha, Jahon sog‘liqni saqlash tashkiloti ekspertlarning mazkur markazga kirishlariga ruxsat berilishiga erishishi shart.

Payshanba kuni Xitoy tashqi ishlar vazirligi rasmiy vakili Chjao Litszyan koronavirus sun'iy yo‘l bilan yaratilgani to‘g‘risidagi taxmin hech qanday dalil bilan asoslanmaganini bildirdi.

Avvalroq Fox News jurnalistlari nomi oshkor qilinmagan manbalarga tayanib ana shunday ta'kid bilan chiqqandi. Qayd etilishicha, virus laboratoriya xodimlaridan biriga ko‘rshapalakdan yuqqan. Keyinroq bu xodim kasallikni Uhanda yashovchilarga yuqtirgan.