08:19 / 20.04.2020
6032

Chexiya prezidenti mamlakat chegaralarini bir yil ochmaslikni taklif qildi 

Chexiya prezidenti Milosh Zeman fuqarolarning xorijga chiqishiga taqiqlovni yana bir yilga uzaytirish zarurligini aytdi.

Foto: Darko Vojinovic / AP

Zeman bunday taklifni mahalliy radiostansiyalardan biriga intervyusida bildirgan, deb xabar berdi Ceske Noviny nashri.

Chexiya prezidentining fikricha, fuqarolar xorijga bormasliklari lozim, yozgi ta'tillar vaqtida esa “Chexiya manzaralaridan bahramand bo‘lganlari” ma'qulroq. Zeman shaxsan o‘zi Chexiya janubidagi o‘lkaga dam olgani borishini aytgan.

Uning fikricha, chegaralarning ochilishi odamlarning koronavirusdan kasallanish darajasi yuqori bo‘lgan mamlakatlarga borishlariga olib keladi, bu esa mamlakatdagi epidemiologik vaziyatni yana yomonlashtirishi mumkin.

Zeman sog‘liqni saqlash vaziri Adam Voytexning cheklovlarni qisman bekor qilish va chexlarga koronavirusdan kasallanish darajasi past bo‘lgan davlatlar – Slovakiya yoki Xorvatiyaga borishlariga ruxsat berish taklifiga shu tarzda munosabat bildirgan. Chexiya prezidenti bu masala may oyidan oldinroq ko‘tarilmasligini ta'kidlab o‘tgan.

O‘z navbatida mamlakatdagi turistik firmalar hukumatdan chegaralarning taxminiy ochilishi muddatini aytishni iltimos qilishgan. Chexiya turistik uyushmasi vitse-prezidenti hukumat fuqarolarga Bolgariya, Gretsiya, Tailand, Vetnam va Maldiv orollariga borishga ham ijozat berishi mumkinligini aytgan.

Chexiya sog‘liqni saqlash vazirligi ma'lumotlariga ko‘ra, mamlakatda koronavirusga chalinganlar 6700 kishini tashkil qilmoqda, ulardan 186 kishi vafot etgan. Chexiyada epidemiyaning eng yuqori darajasi mart oxiri—aprel boshiga to‘g‘ri kelgan. O‘shanda mamlakatda kuniga 300dan ko‘proq kishi koronavirusga chalingan.   

Mavzu
Koronavirus
2019 yilning dekabr oyi oxirida Xitoyning Uxan shahrida noma’lum virus tarqala boshladi. Bu virus havo orqali odamdan odamga yuqadi va o‘limga olib keladi.
Barchasi
Mavzuga oid
Top