Mishustin Rossiyaga ko‘rsatilgan yordam uchun O‘zbekiston hukumatiga minnatdorlik bildirdi

Rossiya bosh vaziri Mixail Mishustin O‘zbekiston bosh vaziri Abdulla Aripov bilan telefon orqali muloqotida koronavirusga qarshi kurashish doirasida Rossiyaga yuborilgan himoya niqoblari va boshqa tibbiy ashyolar uchun minnatdorlik bildirdi. Bu haqda Rossiya hukumati matbuot xizmati xabar berdi.

"Mishustin yangi koronavirus infeksiyasiga qarshi kurashish uchun zarur himoya niqoblari va boshqa ashyolar taqdim etgani uchun O‘zbekiston hukumatiga minnatdorlik bildirib, ushbu insonparvarlik yordami Rossiya-O‘zbekiston munosabatlarining hamkorlik tusini yana bir bor tasdiqlashini ta'kidlab o‘tdi", - deyiladi xabarda.

Qo‘shimcha qilinishicha, Aripov Rossiya tomonidan koronavirusni aniqlash uchun test-tizimlarining tezkor taqdim etilgani hamda rossiyalik epidemolog mutaxassislarning videoaloqa orqali muntazam maslahatlari uchun minnatdorlik bildirgan.

Qayd etilishicha, ikki davlat hukumatlari rahbarlari Rossiya-O‘zbekiston savdo-iqtisodiy hamkorligining dolzarb masalalarini va O‘zbekistonning Yevroosiyo iqtisodiy integratsiyasiga qo‘shilishini ham muhokama qilgan.

Eslatib o‘tamiz, 18 aprel kuni Moskvaga O‘zbekiston insonparvarlik yordamining birinchi partiyasi – tibbiy niqoblar yetib kelgani xabar qilingandi.  

Xabarda aytilishicha, O‘zbekistondan Rossiyaga jami 5 mln dona tibbiy niqob hamda tibbiyot dokalari yetkazib beriladi.