JSST koronavirus sababli kiritilgan cheklov choralarini bosqichma-bosqich olib tashlashga chaqirdi

JSSTning sog‘liqni saqlash sohasidagi favqulodda vaziyatlar bo‘yicha dasturi direktori Maykl Rayanning so‘zlariga ko‘ra, vaziyatni muntazam ravishda nazorat qilish zarur.

Foto: AP /Arek Rataj

Koronavirus sababli turli mamlakatlarda kiritilgan cheklov choralari bosqichma-bosqich bekor qilinishi zarur. Bu haqda JSSTning sog‘liqni saqlash sohasidagi favqulodda vaziyatlar bo‘yicha dasturi direktori Maykl Rayan ma'lum qildi.

"Cheklovlar asta-sekinlik bilan bekor qilinishi va puxta rejalashtirilish shart, vaziyatni muntazam nazorat qilinishi zarur. Agarda mamlakatlar cheklovlarni darhol olib tashlasa, qaytadan cheklov kiritishlariga to‘g‘ri kelishi mumkin", dedi u.

JSST Afrika, Sharqiy Yevropa, Lotin Amerikasi va Osiyoning ayrim davlatlaridagi koronavirus epidemiyasi bilan bog‘liq vaziyatdan tashvishda.

Avvalroq JSST bosh direktori Tedros Adanom Gebreysus koronavirus pandemiyasi hali-beri tugamasligini aytgandi.

Oxirgi ma'lumotlarga ko‘ra, dunyo bo‘yicha koronavirusga chalinganlar soni 3 milliondan oshgan, vafot etganlar soni esa qariyb 209 ming nafarni tashkil qilmoqda.