14:56 / 02.05.2020
8190
Қирғизистонда коронавирусдан вафот этганлар сони ўн нафарга етди

Бугунга келиб Қирғизистонда коронавирусга чалинганлар сони 769 кишига етди, улардан 200 нафари тиббиёт ходимларидир. Ўн киши вафот этди, 527 киши тузалди.

Фото: AFP 2020 / Vyacheslav Oseledko

Қирғизистонда коронавирусдан яна иккита ўлим ҳолати қайд этилди. Бу ҳақда мамлакат коронавирусга қарши кураш бўйича штаби хабар берди.

"Иккинчи май куни республика юқумли касалликлар шифохонасида 2 бемор коронавирусдан вафот этди", - деб маълум қилди штаб вакили.

Унинг сўзларига кўра, вафот этганлардан бири тиббиёт ходими бўлиб, 58 ёшли аёл бўлган, иккинчи бемор Жалолобод вилоятилик 69 ёшли аёл бўлган.

Қайд этилишича, ҳар икки аёлда зотилжам, касалликнинг оғир кечиши, нафас етишмовчилиги кузатилган. Уларда юрак етишмовчилиги, қандли диабет ҳам бўлган.

Бугунга келиб Қирғизистонда коронавирусга чалинганлар сони 769 кишига етди, улардан 200 нафари тиббиёт ходимларидир. Ўн киши вафот этди, 527 киши тузалди.

Коронавирус эпидемияси сабабли мамлакатда фавқулодда вазият эълон қилинган бўлса, қатор шаҳарларда, жумладан пойтахтда фавқулодда ҳолат режими жорий этилган.

Мавзу
Коронавирус
2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.
Барчаси
Top