Tryudo irqchilik muammolari sababli Kanadada politsiyani isloh qilishga va'da berdi

Ayrim xodimlarning tub aholiga nisbatan irqchilik ko‘rinishidagi munosabatlari sababli Kanada politsiyasini islohotlar kutmoqda. Bu haqda Kanada bosh vaziri Jastin Tryudo ma'lum qildi.

"Ko‘plab qora tanli kanadaliklar va mamlakatning tub aholisi politsiya bilan munosabatlarda o‘zini xavfsiz sezmayapti. Buni qabul qilib bo‘lmaydi. Biz buni hukumat sifatida o‘zgartirishimiz kerak", - dedi u. 

Tryudoning so‘zlariga ko‘ra, u bu masalani Kanadadagi barcha regionlar rahbarlari bilan muhokama qilgan va ular uni qo‘llab-quvvatlashgan.

Bosh vazirning fikricha, vaziyatni yaxshilash uchun birinchi navbatda politsiyachilarni ko‘krak videokameralari bilan ta'minlash lozim.

Kanadada keyingi bir necha hafta davomida politsiya va mamlakatning tub aholisi ishtirokida bir nechta voqealar aks etgan videolavhalar tarqaldi. Ularda politsiya xodimlari odamlarga ancha qo‘pollik bilan munosabatda bo‘lgani tasvirlangan.