Qozog‘iston migratsiya nazoratini kuchaytirmoqda

Kazinform axborot agentligi ma’lum qilishicha, Qozog‘iston ichki ishlar vazirining buyrug‘i bilan patrul-post xizmati xodimlarining xorijiy fuqarolar, diplomatik vakolatxonalar va ularga tenglashtirilgan muassasalar xodimlari bilan muloqot qilish tartibiga o‘zgartishlar kiritilgan.

Yangi qoidalarga ko‘ra, politsiya xodimlari xorijliklar bilan xizmat vazifalari doirasidagina muloqot qiladi. Bu huquqbuzarliklarning oldini olish, transport harakati bo‘yicha ma’lumot berish, mehmonxonalar va umumiy ovqatlanish maskanlari haqida axborot taqdim etish kabi vazifalarni o‘z ichiga oladi.

Shuningdek, xorijiy fuqarolar va fuqaroligi bo‘lmagan shaxslarning hujjatlari tekshirilganda ularning chet el pasporti, yashash uchun ruxsatnomasi yoki fuqaroligi bo‘lmagan shaxs guvohnomasining amal qilish muddati, vizasi hamda Qozog‘istonda qonuniy bo‘lib turganligini tasdiqlovchi boshqa hujjatlar mavjudligi o‘rganiladi.

Agar migratsiya qoidalari buzilgani aniqlansa, politsiya xodimlari Ma’muriy huquqbuzarliklar to‘g‘risidagi kodeks talablari asosida tegishli choralarni ko‘radi.

Yangi tartibga muvofiq, patrul-post xizmati xodimlari xorijiy fuqarolar va fuqaroligi bo‘lmagan shaxslarni mamlakatdan chiqarib yuborish jarayonida migratsiya xizmati bo‘linmalariga ko‘maklashadi hamda ularni davlat chegarasidagi o‘tkazish punktlarigacha kuzatib boradi.

Bundan tashqari, politsiya xodimlari chet ellik yo‘lovchining poyezd yoki samolyotdan qolib ketishi, xorijliklar ishtirokidagi huquqbuzarliklar, noqonuniy migratsiya holatlari va noqonuniy muhojirlarni tashish yo‘nalishlari haqida zudlik bilan navbatchilik qismiga xabar berishi shart bo‘ladi.

Mazkur o‘zgartishlar aholi punktlari va shahar tashqarisidagi avtomobil yo‘llarida jamoat tartibi hamda yo‘l harakati xavfsizligini ta’minlash bo‘yicha patrul-post xizmati faoliyatiga oid yo‘riqnomaga ham tatbiq etiladi.