23:01 / 15.06.2020
12937
Хитойда горизонтал жойлашган антиқа осмонўпар иншоот қурилди
Фото: CNN

Хитойнинг Чунцин шаҳридаги осмонўпар бинолар мажмуаси Raffles City Chongqing’да янги диққатга сазовор жой – Crystal деб номланган “горизонтал осмонўпар бино” мажмуаси очилди. Горизонтал жойлашган иншоотни 250 метр баландликда 4 та минора ушлаб туради. 

Таъкидлаш жоиз, ушбу иншоот Сингапурдаги учта осмонўпар бино устида турувчи, кема кўринишидаги машҳур Marina Bay Sands меҳмонхонасига ўхшаш.

Фото: CNN

Иншоотнинг узунлиги 300 метрни, оғирлиги 12 минг тоннани ташкил қилади. Минорадаги лифтлар ташриф буюрувчиларни Crystal’га 50 сонияда етказади.

Иншоотда мустамлака қилинган Марсдаги келажак ҳаётга бағишланган кўргазма павильони ҳамда ойнаванд полли томоша майдончаси жойлашган.

Айнан томоша майдончаси ўзига кўплаб сайёҳларни жалб қилади. Ундан бутун шаҳарга ва Янцзи ҳамда Цзялин дарёларига чиройли манзара очилади. 

Таъкидланишича, кўплаб ташриф буюрувчилар шиша полли майдончада туриб бош айланишни ҳис қиладилар. Баъзилар учун эса бундай полдан 2-3 метр юриш ҳам ҳақиқий муаммо ҳисобланади.

Маълум қилинишича, яқин орада Crystal’да сув ҳавзалари, ресторанлар ва барларга эга хусусий клуб очилади.

Top