AQSh Bashar Asad va uning rafiqasiga qarshi sanksiyalar kiritdi 

Bu haqda AQSh davlat kotibi Mayk Pompeo e'lon qildi.

Gap Suriya xalqiga qarshi urush olib borish va vahshiyliklar uchun “Tsezar qonuni” deb ataluvchi Suriya fuqarolarini himoyalash haqidagi hujjat (CAESAR Syria Civilian Protection Act) doirasida siyosiy va iqtisodiy cheklovlar kiritilishi haqida bormoqda.  

“Bugun biz Tsezar qonuni bo‘yicha Asad tuzumiga nisbatan sanksiyalar siyosatini boshlaymiz. U Asad tuzumini va uning xorijiy yordamchilarini Suriya xalqiga nisbatan amalga oshirilgan vahshiy harakatlar uchun javob berishga majbur qilish maqsadida qat'iy iqtisodiy sanksiyalar kiritishga imkon beradi”, deb yozgan Pompeo tvitterda.

AQSh davlat kotibining ta'kidlashicha, Bashar Asad va uning tuzumi behuda urushni to‘xtatishi va Suriyadagi ixtilofni siyosiy hal qilishga rozi bo‘lishi uchun unga qarshi sanksiyalar kiritib boriladi. Ulardan maqsad Asad tuzumini iqtisodiy va siyosiy ko‘makdan mahrum etish hisoblanadi. Ushbu tuzum bilan ish ko‘radigan barcha shaxslarga AQSh hududiga va bozorlariga kirish taqiqlanadi. 

Hozircha sanksiyalar Suriyaning 39 fuqarosi va tashkilotiga qarshi kiritilmoqda. Sanksiyalar ostiga Bashar Asad, uning rafiqasi va singlisi Bushradan tashqari, Suriyadagi ixtilofda hukumat kuchlari tomonida ishtirok etayotgan va Eron bilan aloqaga ega “Fatimiyun” afg‘on shialari tashkiloti, prezidentning ukasi, 4-zirhli tank diviziyasi qo‘mondoni Mohir Asad, diviziyaning o‘zi va boshqa qo‘mondonlar tushgan. Shuningdek, sanksiyalar suriyalik yirik tadbirkor Muhammad Hamshoga qarshi kiritilgan. U AQSh davlat departamentida Asad tuzumi vahshiyliklarining homiysi deb atalgan.     

Sanksiyalar Suriya aholisiga insonparvarlik yordami yetkazilishiga ta'sir qilmaydi. 

AQSh prezidenti Donald Tramp “Tsezar qonuni”ni 2019 yil dekabrda imzolagan. Ta'kidlanishicha, ushbu hujjat Tsezar shartli nomiga ega suriyalik harbiy fotosuratchi sharafiga shunday atalgan. Ushbu fotosuratchi Suriyadan u yerdagi turmalarda saqlanuvchi mahbuslarning qiynoqqa solinishi va o‘ldirilishi suratlarini olib chiqqan.