19:22 / 06.07.2020
11782
Сооронбай Жээнбеков Қирғизистонда коронавирус билан боғлиқ вазият мураккаб эканлигини айтди

 Жаҳон соғлиқни сақлаш ташкилоти Қирғизистон ва Қозоғистонни коронавирусга чалинганлар сони жадал ўсаётган давлатлар тоифасига киритганди.

Фото: Қирғизистон президенти матбуот хизмати

 «Ҳозирда бутун мамлакат бўйича фавқулодда ҳолат режимини жорий этиш масаласи кўриб чиқилмаяпти», — деди Қирғизистон президенти Сооронбай Жээнбеков мамлакат хавфсизлик кенгаши йиғилишида.

 У санитар-эпидемиологик, карантин чекловларига риоя қилиш барча учун мажбурий эканлигини эслатиб ўтди.

«Касалликка қарши курашда фуқаролик масъулияти катта аҳамиятга эга. Биз вазият мураккаб эканлигини, оддий эмаслигини очиқчасига тан оламиз. Синовлардан ўтиш ҳар бир авлоднинг пешонасига битилган», — деди Сооронбай Жээнбеков.

 Эслатиб ўтамиз, Жаҳон соғлиқни сақлаш ташкилоти Қирғизистон ва Қозоғистонни коронавирусга чалинганлар сони жадал ўсаётган давлатлар тоифасига киритганди.

Аввалроқ Қирғизистон ҳукумати аппаратининг 26 нафар ходимида коронавирус инфекцияси аниқланган.

 24 июнь куни Қирғизистон президенти Москвада бўлиб ўтган Иккинчи жаҳон урушидаги ғалабанинг 75 йиллигига бағишланган тадбирларда қатнашмади.

 Маълум қилинишича, Жээнбеков делегациясига ҳамроҳлик қилган икки нафар шахсда коронавирусга тест мусбат натижа берган.

 Коронавирус Қирғизистон президенти девони ташқи сиёсат бўлими бошлиғи Дониёр Сидиқов ва қўриқлаш хизматининг бир нафар ходимида аниқланган.

Мавзу
Коронавирус
2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.
Барчаси
Top