London birinchi marta eng ommabop turistik yo‘nalishlar yuqori o‘ntaligiga kirmadi

London tarixda birinchi marta Yevropadagi eng ommabop turistik shaharlar ro‘yxatining yuqori o‘ntaligiga kirmadi. Bu haqda MarketWatch nashri ForwardKeys kompaniyasi tadqiqotlariga tayanib xabar berdi.

Bir yil avval bron qilishlar soni bo‘yicha yetakchilik qilgan Britaniya poytaxti bu yilgi reytingda 11-o‘rindan joy oldi. ForwardKeys ma'lumotiga ko‘ra, ayni paytda shaharda bron qilishlar hajmi 2019 yilgi ko‘rsatkichning 5 foizga yaqinini tashkil etmoqda.

"London turistlar uchun dunyodagi eng ommabop yo‘nalishlardan biri. Uning yuqori o‘ntalikdan chiqib ketishi COVID-19 pandemiyasi oqibatlari qanchalik dahshatli ekanligini ko‘rsatadi", - deydi ForwardKeys vitse-prezidenti Olive Ponti.

Tadqiqot natijalari aviakompaniyalar, mehmonxona va turistik operatorlar aksiyalariga mablag‘ kiritadigan investorlar uchun ogohlantirish bo‘lishi mumkin, deb yozadi MarketWatch.