Magistratura imtihoniga kirolmaganlarga qo‘shimcha test bo‘ladi

Respublika oliy ta'lim muassasalari magistraturasiga o‘qishga kirish uchun ro‘yxatdan o‘tgan (ariza bergan) ammo uzrli sabablarga ko‘ra onlayn test sinovlarida ishtirok eta olmagan abituriyentlarning murojaatlariga asosan (ariza bilan murojaat qilgan hamda arizalari asosli deb topilgan) ular uchun 2020 yil 22 sentabr kuni soat 10:00da onlayn test sinovlari o‘tkaziladi.

Mazkur onlayn test sinovlarida ishtirok etishga ruxsat etilgan (ariza bilan murojaat qilgan hamda arizalari asosli deb topilgan) abituriyentlar 2020 yil 21 sentabr kuni soat 10:00dan boshlab o‘zlarining shaxsiy kabinetlaridan login va paroli orqali onlayn test sinovlarida ishtirok etish ruxsatnomasini olishlari mumkin.

Ushbu toifadagi abituriyentlardan ruxsatnomalarida belgilangan manzillarga (hudud, bino) fuqarolik pasporti hamda testda ishtirok etish ruxsatnomasi bilan 22 sentabr kuni soat 09:30ga qadar yetib kelishlari talab etiladi.

Oliy va o‘rta maxsus ta'lim vazirligi matbuot xizmati belgilangan muddatdan kech kelgan abituriyentlar test sinovlariga kiritilmasligi haqida ogohlantirgan.

• Eslatib o‘tamiz, magistraturaga kirish imtihonlari 8-20 sentabr kunlari o‘tkazildi. Talabgor imtihondagi natijasini test tugashi bilan bilishi mumkin. Joriy o‘quv yilida ta'limning magistratura bosqichiga respublika bo‘yicha jami 10 425 nafar talaba qabul qilinishi belgilangan. Shundan 5475 nafari grant, 4950 nafari to‘lov-kontrakt asosida tahsil oladi.