O‘zbekiston-Hindiston biznes forumi tashkil qilindi

Kun.uz muxbirining xabar berishicha, tadbirda savdo-sanoat palatasi raisi Adham Ikromov sog‘liqni saqlash va farmatsevtika yo‘nalishlarida hind kompaniyalari O‘zbekistondagi eng faol pozitsiyalarni egallab turganini ta'kidladi. Shuningdek, Ikromov Hindiston Savdo-sanoat palatalari federatsiyasiga hamda ikki mamlakat elchixonalariga iqtisodiy hamkorlikni rivojlantirish yo‘lidagi harakatlari uchun minnatdorlik bildirdi.

Ma'lum qilinishicha, 2020 yilning yanvar-avgust oylarida ikki mamlakat o‘rtasidagi tovar ayirboshlash hajmi 198 million AQSh dollaridan oshgan. 2020 yil 1 iyul holatiga ko‘ra, O‘zbekistonda faoliyat yuritayotgan hind kompaniyalari soni 277tani tashkil qilmoqda.

Tadbirda so‘z olgan Hindistonning O‘zbekistondagi favqulodda va muxtor elchisi Manish Prabhat ikki mamlakat o‘rtasidagi savdo aloqalari pandemiyaga qaramay 20 foizdan ortiqroqqa o‘sganini ta'kidladi. Shuningdek, hind aviakompaniyalari O‘zbekiston bozoriga kirishga qiziqayotgani hamda mamlakatlar o‘rtasidagi tovar aylanmasini 1 milliard dollarga yetkazishga harakat qilinayotgani qayd etildi.