Yapon tadqiqotchilari niqoblar koronavirusdan himoyalanishda foydali ekanini isbotlashdi

Tokio universiteti olimlari maneken boshlarini bir-biriga qaratgan holda kameralar bilan jihozlangan yopiq bo‘lma tashkil etishdi, deb xabar bermoqda Reuters.

Tajribada maxsus jihozlangan bitta maneken yo‘tal simulyatsiyasi bilan haqiqiy koronavirus zarralarini chiqarib yubordi. Ikkinchi maneken nafas olishni taqlid qilib, havo yo‘li orqali kirib boradigan infeksiyalarni maxsus bo‘linmachaga joyladi.

Tajribada paxta niqob taqqan holda virusni yuqtirish darajasi niqobsiz holatdagiga taqqoslaganda 40 foizgacha kamaygan.

Tibbiy mutaxassislar tomonidan ishlatiladigan N95 niqobi esa virusni 90 foizgacha to‘sib qo‘ygan. Biroq N95 niqob taqilganda ham ba'zi virus zarralari ikkinchi manekendagi maxsus bo‘linmachaga o‘tgani kuzatilgan.

Yo‘talayotgan manekenga niqob taqilganida, paxta va jarrohlik niqoblari koronaviruslarning 50 foizdan ortig‘ini to‘sib qolgan.

«Virus qabul qiluvchisi ham, virus tarqatuvchisi ham niqob kiyishi ijobiy ta'sir ko‘rsatadi», – deya xulosa qilgan tadqiqotchilar chorshanba kuni chop etilgan maqolada.

Yaponiyalik tadqiqotchilarning boshqa bir guruhi esa kompyuter simulyatsiyalaridan foydalanib, namlik darajasi virus zarralarining havoga tarqalishiga sezilarli ta'sir ko‘rsatishi mumkinligini isbotlashdi.