21:45 / 27.10.2020
9485
Арманистонда контрразведка бошлиғи ва чегара қўшинлари қўмондони ишдан олинди

Арманистон Миллий хавфсизлик хизмати контрразведка департаменти бошлиғи Ованес Карумян ва чегара қўшинлари штаби бошлиғи Гагик Тевосян истеъфога чиқарилди. Бундан ташқари, тан олинмаган Тоғли Қорабоғ республикаси мудофаа вазири Жалал Арутюнян Озарбойжон билан жангларда ярадор бўлгани сабабли алмаштирилди.

Фото: Getty Images

Карумян ва Тевосяннинг бўшатилиши сабаблари маълум қилинмаган. Бироқ бундан олдинроқ Миллий хавфсизлик хизмати раҳбари Армен Айвазян собиқ юқори лавозимдаги ҳарбий жосусликка ёллангани ҳолати аниқланганини маълум қилган. Собиқ амалдор ҳарбий қисмлардан ахборот олиб, уни Озарбойжонга берган. Шунингдек, хорижликларга сафарбарлик ва ҳарбий техника ҳақида ахборот берилган. Аввалроқ, октябрь бошида Арманистонда жосусликда гумон қилинган бир неча хорижлик қўлга олингани маълум қилинган.    

Тоғли Қорабоғ президенти Араик Арутюняннинг маълум қилишича, республика мудофаа вазири жангларда ярадор бўлгани сабабли алмаштирилди. Унинг айтишича, бу ўзгартириш “муҳокамаларга сабаб бўлмаслиги керак”. “Жалал Анатольевичга тезроқ соғайиб кетишни тилайман ва у тез орада ватан хизматига яна қайтишига ишонаман”, деб ёзган Арутюнян Facebook’да. Жалал Арутюнян ўрнига генерал-майор Микаел Арзуманян тайинланган.

Тоғли Қорабоғда бир ойдан бери Арманистон ва Озарбойжон қуролли кучлари ўртасида жанглар давом этмоқда. Томонлар ярашув ҳақида уч марта келишган, бироқ ўқ отишни тўхтатишга барча уринишлар барбод бўлган.

Мавзу
Озарбойжон-Арманистон можароси
12 июль куни Озарбойжон шимоли-ғарбидаги Товуз вилояти ҳудудида икки давлат қўшинлари ўртасида тўқнашув содир бўлди.
Барчаси
Top