Turkiya Tog‘li Qorabog‘ga tinchlikparvar kuchlarini kiritish borasida rezolyutsiya qabul qiladi

Turkiya parlamenti Tog‘li Qorabog‘ga o‘z tinchlikparvar kuchlarini kiritish borasida rezolyutsiyani qabul qilish ustida ishlamoqda. Taxminlarga ko‘ra, harbiylar noyabr oyining oxirigacha ziddiyatli hududga kirib boradi. Sabah agentligining xabar berishicha, ma'lumotni parlamentdagi o‘ngchilardan Adolat partiyasi vakillari tasdiqlagan.

Rasmiy hujjatda tinchlikparvar kuchlar tomonidan bajariladigan aniq vazifalar va ularning joylashuv hududi belgilab beriladi. Ma'lum qilinishicha, turk harbiylari rossiyalik hamkasblari bilan birgalikda Ozarboyjon va Armaniston o‘rtasida kelishilgan sulh shartlari bajarilishini nazorat qiladi. «Masala tez orada parlament tomonidan ko‘rib chiqiladi va hal qilinadi», – deyiladi xabarda.

9 noyabr kuni Ozarboyjon Respublikasi Prezidenti Aliyev, Armaniston Respublikasi Bosh vaziri Pashinyan va Rossiya Federatsiyasi Prezidenti 2020 yilning 10 noyabridan Tog‘li Qorabog‘ hududida o‘t ochishni butunlay to‘xtatishni nazarda tutuvchi bayonotni imzolaganini e'lon qilgan edi.

Shundan so‘ng 2 mingga yaqin Rossiya tinchlikparvar kuchlari hududga 5 yil muddatga kirib kelgani ma'lum qilindi.

11 noyabr kuni esa Turkiya prezidenti Rajab Toyyib Erdo‘g‘an Tog‘li Qorabog‘da o‘t ochishni to‘xtatishni nazorat qilish qo‘shma markazi bo‘yicha Rossiya-Turkiya bayonnomasi imzolanganini ma'lum qildi.