Tog‘li Qorabog‘ning sobiq davlat vaziri Ruben Vardanyan 20 yilga qamaldi

Bokudagi sud Armaniston fuqarosi, tan olinmagan Tog‘li Qorabog‘ Respublikasining sobiq davlat vaziri Ruben Vardanyanni 20 yilga ozodlikdan mahrum qildi. Bu haqda 17 fevral kuni Ozarboyjon OAV xabar berdi. Avvalroq davlat ayblovchisi unga umrbod qamoq jazosini so‘ragan edi.

Sud Vardanyanni Ozarboyjon Jinoyat kodeksining bir qator moddalari, jumladan, tajovuzkor urushni rejalashtirish va olib borish, aholini deportatsiya qilish va majburiy ko‘chirish, ta’qib qilish, noqonuniy ozodlikdan mahrum qilish, qiynoqlar, yollanish, urush qonunlari va urf-odatlarini buzish, terrorizm va terrorizmni moliyalashtirish, jinoiy uyushma tuzish, noqonuniy qurol savdosi, aviatsiya xavfsizligiga tahdid qilish, hokimiyatni zo‘ravonlik bilan egallab olish, noqonuniy qurolli tuzilmalar tuzish va davlat chegarasini noqonuniy kesib o‘tish kabi moddalar bo‘yicha aybdor deb topdi.

2023 yil sentabr oyida Ozarboyjon tan olinmagan Tog‘li Qorabog‘ Respublikasi hududida harbiy operatsiya o‘tkazdi. Oqibatda qurolli tuzilmalar qurolsizlantirildi, mintaqaning bir qator sobiq rahbarlari Ozarboyjon tomonidan qo‘lga olindi. Hibsga olinganlar orasida davlat vaziri lavozimida ishlagan Vardanyan ham bor edi.

5 fevral kuni Bokudagi harbiy sud Tog‘li Qorabog‘ Respublikasining sobiq rahbarlariga nisbatan ham hukm chiqargan edi. Mahalliy OAV ma’lumotlariga ko‘ra, Arayik Arutyunyan (tan olinmagan respublika prezidenti), Levon Mnatsakanyan (armiya qo‘mondoni), David Manukyan (armiya qo‘mondoni o‘rinbosari), David Ishxanyan (parlament raisi) va David Babayan (TIV rahbari) umrbod qamoq jazosiga hukm qilingan.